Трамп Венесуэла бўйича яна таҳдидли баёнот берди

АҚШ президенти Доналд Трамп авиалиниялар Венесуэла ҳаво ҳудудини ёпиқ деб ҳисоблаши кераклигини айтди.

Президентнинг бу баёноти Қўшма Штатларнинг Жанубий Америка давлатига ҳужум қилиш бўйича кучайиб бораётган таҳдидларидан кейин янгради.

АҚШ президенти Доналд Трамп шанба куни америка авиакомпанияларига Венесуэла ҳаво ҳудудини ёпиқ деб ҳисоблашни айтди. Бу, сўнгги ҳафталарда Вашингтон ва Каракас ўртасида кескинлик кучайиб, АҚШНИнг Венесуэлага ҳужум қилиши мумкинлиги ҳақидаги таҳдидлар ортиб бораётган бир пайтда, мамлакат раҳбариятига бўлган босимни янада оширди.

Трамп бошқа бир давлатнинг ҳаво ҳудудини ёпиш бўйича қонуний ҳуқуққа эга бўлмаса-да, бундай огоҳлантириш баъзан ҳаво зарбалари олдидан қўйиладиган биринчи қадам бўлади. Унинг баёноти сўнгги ҳафталарда АҚШНИнг минтақага катта миқдорда ҳарбий куч жойлаштиргани ортидан янгради.

Трамп Венесуэла президенти Николас Мадурони бир неча бор қўрқитиб келмоқда. Бу қарор венесуэлаликларнинг ҳаётига ҳам, мамлакат иқтисодиётига ҳам жиддий таъсир кўрсатиши мумкин.

“Барча авиакомпаниялар, учувчилар, гиёҳванд моддалар савдогарлари ва одам савдоси билан шуғулланувчилар – илтимос, Венесуэла ҳудуди устидаги ва атрофидаги ҳаво мактабини тўлиқ ёпиқ деб ҳисобланг” — деб ёзди Трамп Truth Social тармоғида.

Оқ уй эса Трамп нима сабабдан самолётларни Венесуэла устидан учмасликка чақираётгани ҳақида изоҳ бермади.

Сўнгги ҳафталарда Трампнинг таҳдидларига жавобан қўшинларни кенг сафарбар қилган Мадуро ҳукумати Трампнинг баёнотини “Венесуэла халқига қарши янги ғайриоддий, ноқонуний ва асоссиз тажовуз” деб атади.

“Венесуэла ҳеч қандай хорижий давлатнинг буйруқлари, таҳдидлари ёки аралашувини қабул қилмайди,” — дейилади ҳукуматнинг Инстаграмда эълон қилган баёнотида.

Ҳукумат қўшимча қилди: бу ҳаракатлар орқали Трамп маъмурияти Венесуэлага мунтазам амалга ошириладиган ҳафталик депортация рейсларини ҳам бир томонлама тўхтатган. Бу рейслар йил бошида Оқ уй ва Мадуро ҳукумати ўртасида келишиб олинган эди.

Трамп маъмурияти Мадуро ва унинг хавфсизлик хизматининг юқори мартабали амалдорларини АҚШГА гиёҳванд модда етказиб берадиган наркокартел раҳбарлари сифатида айблаб келади.

Маъмурият 24 ноябрь куни “Қуёшлар картели” деб аталувчи гуруҳни хорижий террорчи ташкилот сифатида белгилади. Бу эса Пентагон учун Венесуэла ҳукуматининг нишонларига зарба бериш учун ҳуқуқий асос бўлиши мумкин. Аммо бу гуруҳ на расмий ташкилот, на ҳақиқий картелдир.

АҚШ ва Венесуэла ўртасидаги кескинлик Америка ҳарбий патруллари Венесуэла сувларига яқин ҳудудларда кўпайгани ортидан кучаймоқда. Вашингтон буни гиёҳванд моддалар контрабандаси билан кураш деб изоҳласа, Каракас буни босим ва қўрқитиш сифатида кўрмоқда.

Бунга қўшимча равишда, АҚШнинг янги санкциялари ва Венесуэла нефтьини сотиб олаётган давлатларга 25 фоизлик бож жорий қилиши мамлакатнинг аллақачон заиф иқтисодиётига янада босим қўймоқда. Шу билан бирга, Венесуэланинг Россия, Хитой ва Эрон билан яқинлашиб бораётган алоқалари АҚШни хавотирга солмоқда — Вашингтон бу жараённи минтақада рақиб давлатлар таъсирининг ортиши сифатида кўрмоқда.

Ушбу омиллар иқтисодий алоқалар чекланган бўлишига қарамай, икки давлат ўртасидаги муносабатларни тобора кескинроқ ва қарама-қарши тусга киритмоқда.