Ўзбекистон ЖЧ қуръасида 3-саватчадан жой олди
Унда Норвегия, Панама, Миср, Жазоир, Шотландия, Парагвай, Тунис каби давлатлар бор. Қуръа ташлаш маросими 5 декабр куни АҚШда ўтказилади.
Ўзбекистон ЖЧ қуръасида 3-саватчадан жой олди. ФИФА 2026 йилги Жаҳон чемпионати қуръаси саватларини эълон қилди.
Турнир қатнашчилари саватларга қуйидагича тақсимланди:
1-сават: Канада, Мексика, АҚШ (мусобақа мезбонлари), Испания, Аргентина, Франция, Англия, Бразилия, Португалия, Нидерландия, Белгия, Германия.
2-сават: Хорватия, Марокаш, Колумбия, Уругвай, Швейцария, Япония, Сенегал, Эрон, Жанубий Корея, Эквадор, Австрия, Австралия.
3-сават: Норвегия, Панама, Миср, Жазоир, Шотландия, Парагвай, Тунис, Кот-д'Ивуар, Ўзбекистон, Қатар, Саудия Арабистони, Жанубий Африка.
4-сават: Иордания, Кабо-Верде, Гана, Кюрасао, Гаити, Янги Зеландия, Европа плей-офф жамоалари (A, B, C, D гуруҳи ғолиблари), ФИФА қитъалараро плей-офф босқич 1 ва 2-ғолиблари.
Гуруҳларни шакллантиришда ҳар бир саватдан биттадан жамоа олинади. Шунда 4 та жамоадан иборат 12 та гуруҳ пайдо бўлади. 3-саватдан жой олган Норвегия, Панама, Миср, Жазоир, Шотландия, Парагвай, Тунис, Кот-д'Ивуар, Қатар, Саудия Арабистони ва ЖАР гуруҳ босқичида Ўзбекистонга рақиб бўлмайди.
ЖЧ 2026 йил июн-июл ойларида ўтказилади. Қуръа маросими 5 декабр куни АҚШда ўтказилади.