Провокацияга эътибор берманг, бундан юқорироқ юринг – Безруков
Россиялик актёр 2 ой олдинги гаплари ҳозирга келиб умуман нотўғри талқин қилинаётганини билдирди.
Россиялик таниқли актёр Сергей Безруков сўнгги кунларда ўзига қарши провокация кетаётганини айтиб чиқди.
Гап нимада?
"Тасс" агентлиги 2 ой олдин ўтказган матбуот анжуманида бир мухбирнинг Тошкентдаги қизиқ воқеани айтиб беринг, деган саволига Безруков ярим кечаси қабристонга борганини "юмор билан" сўзлаб берган.
Ўшанда актёр Татяна Есенина қабрини зиёрат қилмоқчи бўлгани, кейин самолётда Россияга учиб кетишини билдирган. Татяна Есенина машҳур рус шоири Сергей Есениннинг қизи, у 1992 йил Тошкентда вафот этиб, шу ерга дафн этилган.
Шундан кейин ижтимоий тармоқларда Безруковни ўзбек халқининг устидан кулишда айблаб қатор постлар жойлаштирилган. Охири актёр бу воқеага муносабат беришга мажбур бўлган.
"Кимдир менинг сўзларимни ўзбек тили ва ўзбек халқи устидан кулиш деб талқин қилиб чиқибди. Бу албатта провокация. Буни жуда яхши билиб турибман, миллатлараро низо чиқаришмоқчи.
Тасс билан ўтган матбуот анжуманида айтган, 2 ой олдин, воқеа Тошкентда бундан 4 йил олдин содир бўлган. Ўшанда Татяна Есенина қабрига гул қўйгандим, кечаси қабристонни очиб беришганди. Ҳа, тўғри, ҳазил аралаш гапирганман. Бу воқеани шу 4 йил мобайнида Россияда ҳам, Ўзбекистонда ҳам шундай юмор билан айтганман, ҳазилдек қабул қилишган.
Ўзбекистонга нисбатан муносабатимни биласизлар, гастролларга борганда қанчалар постлар қўйганман. Ўзбек маданияти, ўзбек ошхонаси ва меҳмондўстлигидан ҳайратланганман ва ҳамон шундай. Яна шуни биламанки, Ўзбекистонда мени яхши кўришади, мени кутишади. Мен ҳам худди шундайман.
Саша Белийни яхши кўришади. Келинг, бундай қиламиз, Саня Белий Ўзбекистон ва ўзбек халқига қарши бирор нарса дейиши мумкинми? А, мумкинми? Менимча, йўқ. Фарик билан (Фарҳод Маҳмудов) ҳалиям дўстмиз, актёрлик маҳоратидан ВГИКда бирга дарс берамиз.
Нималар деяпсиз? Ўзбекистонни ва ўзбек халқини ҳозир ҳам яхши кўрадиган ва ҳурмат қиладиган Сергей Безруков. Провокацияга эътибор берманг, бундан юқорироқ юринг. Ҳурмат билан", деб гапини тугатган Безруков.
Маълумот ўрнида, Сергей Безруков Есенин, Пушкин каби шоирларни маромига етказиб гавдалантирган. "Висоцкий" филмининг аксарият қисмини Тошкент ва Бухорода суратга олишган. У Ўзбекистонга хизмат сафари билан тез-тез келиб, актёрлик маҳорат дарсларини ўтиб кетади.