АҚШ ва Жанубий Корея савдо битимини имзолади
Жанубий Корея АҚШга 350 миллиард доллар сармоя киритишга рози бўлди, бунинг эвазига автомобил экспортига бож ставкалари пасайтирилади.
Имзоланган келишувга кўра, АҚШ Жанубий Кореядан импорт қилинадиган автомобилларга бож ставкасини 25 фоиздан 15 фоизгача камайтиради. Бу Жанубий Корея автомобил саноати учун енгиллик яратади, чунки илгари улар Япониядаги рақобатчиларига нисбатан юқорироқ бож тўловларига дуч келишган эди. Битим АҚШ президенти Доналд Трамп ва Жанубий Корея президенти Ли Жа Мюнг ўртасида тузилган.
Мазкур битим июл ойида тузилган дастлабки келишувдан кейин бир неча ойлик музокараларга якун ясади.
Лининг сиёсий маслаҳатчиси Ким Ёнг-Бомнинг айтишича, келишув доирасида Жанубий Корея АҚШга 200 миллиард доллар миқдорида нақд сармоя киритишга рози бўлган. Ҳар йили сармоя ҳажми 20 миллиард доллардан ошмаслиги белгиланган бўлиб, дастлабки сармоя қоплангунга қадар фойда икки давлат ўртасида тақсимланади.
Қолган 150 миллиард доллар эса икки мамлакат ўртасидаги кема қуриш бўйича ҳамкорлик лойиҳаси орқали таъминланади.
Жанубий Кореянинг юқори мартабали расмийлари аввалроқ, мамлакат Япония билан АҚШ ўртасидаги келишувни такрорлай олмаслигини, чунки чет эл валюта захиралари кичиклиги ва АҚШ билан валюта алмашинув битими йўқлигини таъкидлашган эди.
Миллий ассамблеяда сўзлаган Жанубий Корея Марказий банки раҳбари Ри Чанг-Ёнг АҚШга ҳар йили 15–20 миллиард доллар миқдорида сармоя киритиш вон валютасининг қийматига нейтрал таъсир кўрсатишини билдирди.
АҚШ томонидан автомобил импортига бож ставкасининг камайтирилиши Жанубий Корея автомобил саноатини Япония билан тенг шароитга олиб чиқади — япон автомобилларига ҳозир 15 фоизлик бож қўлланилади.
Маълумотларга кўра, ўтган йили Жанубий Кореянинг АҚШга экспортининг учдан бир қисмини автомобиллар ташкил этган.