Тошкентда янги иссиқлик тарифлари 12 ноябрдан кучга киради
Бу ҳақда Veolia Energy маълум қилди. Лекин Тошкент шаҳар ҳокими имзолаган қарорда нархлар расмий эълон қилинган кундан кучга кириши айтилганди.
Тошкентда янги иссиқлик тарифлари 12 ноябрдан амал қилади.
Тошкент шаҳри ҳокимининг 2025 йил 27 октябрдаги қарорига асосан, Veolia Energy Ташкент компанияси томонидан кўрсатиладиган марказлашган иссиқлик таъминоти хизматлари учун янги тарифлар тасдиқланди.
Янги тарифлар 2025 йил 12 ноябрдан бошлаб амал қилади.
"Давлат томонидан жорий этилган субсидиялаш механизми туфайли пойтахт аҳолиси иссиқлик энергиясининг тўлиқ қийматини тўламайди. Харажатларнинг тахминан 80 фоизи маҳаллий бюджет ҳисобидан қопланади", дейилади Veolia Energy хабарида.
Тарифлар Тошкент шаҳар ҳокимияти томонидан тизим мутахассиси томонидан тақдим этилган иқтисодий ҳисоб-китоблар ва техник маълумотлар асосида тасдиқланган.
Маблағлар фақатгина иссиқлик ва иссиқ сув билан таъминлаш, шунингдек, пойтахт иссиқлик таъминоти инфратузилмасини таъмирлаш ва янгилаш ишларига йўналтирилади.
Айтилишича, 2025–2026 йиллар иситиш мавсумларига тайёргарлик ва модернизация дастури доирасида компания қуйидаги ишларни амалга оширмоқда:
• 474,13 км эскирган тармоқларни жорий таъмирлаш;
• 73,5 км иссиқлик тармоқларини янгилаш;
• 21,34 км иссиқлик изоляциясини тиклаш;
• 23 та маҳаллий қозонхона ва 13 та насос станциясини модернизация қилиш;
• 669 та клапан ва 345 та компенсаторни алмаштириш.
Лекин 27 октябр куни Тошкент шаҳар ҳокими имзолаган қарорда нархлар расмий эълон қилинган кундан кучга кириши айтилганди.