Яна бир ҳоким ўринбосари пора билан ушланди
У ер ажратиш ва юқоридаги танишлари орқали расмийлаштириш эвазига 15 минг доллар сўраган.
Андижон вилояти Марҳамат тумани ҳокимининг инвестиция бўйича ўринбосари мансаб мавқеидан фойдаланиб, бир фуқародан 15 минг АҚШ доллари талаб қилиб, олдиндан 200 АҚШ доллари олган.
У туман ҳудудидан ўтган катта йўл бўйида 400 метр узунликдаги зовурни ёпиқ тизимга ўтказган ҳолда, бунинг ҳисобига юзага келадиган 60 сотих ер майдонида ҳар бири 30 кв/м бўлган жами 8 та савдо дўкони қуриш учун ер ажратиш ва тегишли ҳужжатларни юқори лавозимда ишловчи танишлари орқали расмийлаштириб беришни ваъда қилган.
Давлат хавфсизлик хизмати ва Бош прокуратура ҳузуридаги департамент ходимлари ҳамкорлигида ўтказилган тезкор тадбирда ҳоким ўринбосари қолган 14800 АҚШ долларини олган вақтида ашёвий далиллар билан ушланган.
Ҳозир ушбу мансабдор шахсга нисбатан Жиноят кодексининг 168-моддаси 3-қисми “а,в” бандлари ва 28, 211-моддаси 2-қисми “б” банди билан жиноят иши қўзғатилиб, “қамоқ” эҳтиёт чораси қўлланилган. Тергов ҳаракатлари олиб борилмоқда.