Россиялик сайёҳларнинг Европага киришини бутунлай тақиқлаш таклиф этилди

Айрим Европа давлатлари россиялик сайёҳлар учун мамлакатларга киришни бутунлай тақиқлашни таклиф қилишди. Бу таклиф Россияга қарши санкцияларнинг 19-пакети муҳокамаси чоғида билдирилди, деб хабар беради Euroactiv манбаларга асосланиб.

Муҳокама қилинаётган чора-тадбирларга кўра, Европа Иттифоқига аъзо давлатлардан россияликларга туристик визалар бериш қоидаларини бирлаштириш сўралиши мумкин.

Баъзи давлатлар, жумладан Полша, Болтиқбўйи давлатлари ва Финляндия аллақачон амалиётларни сезиларли даражада чеклаб қўйган, Италия, Испания, Гретсия ва Франтсия эса либерал ёндашувни сақлаб қолишган.

Қўшимча чора россиялик дипломатларнинг Шенген ҳудудида ҳаракатланиш эркинлигини чеклаш бўлиши мумкин. Чехия томонидан фаол илгари сурилган ташаббус дипломатларни аккредитация қилинган мамлакатга боғлашни ўз ичига олади.

Нашрнинг ёзишича, сиёсатни кучайтиришга ёзги мавсумда россиялик сайёҳларнинг ЕИга рекорд даражада келиши сабаб бўлган — Еврокомиссия маълумотларига кўра, 2024 йилда 500 мингдан ортиқ Шенген визаси берилган. Янги чекловлар бўйича қарор қабул қилиш Европа Иттифоқига аъзо давлатлар ўртасида мувофиқлаштиришни талаб қилади.

Украинада можаро бошланганидан кейин Латвия, Литва, Полша, Финляндия, Чехия ва Эстония бошқа мамлакатлардан Шенген визаси олган Россия фуқароларини киритишни тўхтатди. Эндиликда бу мамлакатларга фақат Шенген давлатларидан бирининг фуқаролиги ёки яшаш рухсати бор ёки бошқа давлатларнинг фуқаролигига эга бўлган россияликлар кириши мумкин.

Европа Иттифоқи Россия билан соддалаштирилган виза режимини тўхтатиб, Шенген визасига қўйиладиган талабларни кучайтирди, қатор давлатлар, жумладан Бельгия, Дания, Исландия, Латвия, Литва, Нидерландия, Норвегия, Полша, Словакия, Финляндия, Чехия ва Эстония россияликларга сайёҳлик визасини беришни тўхтатди.

Аввалроқ Politico Чехиянинг россиялик дипломатларнинг Шенген ҳудудида эркин ҳаракатланишини чеклаш таклифи ҳақида хабар берган. Бунга жавобан Россия ТИВ Европа муаммолари департаменти директори Владислав Масленников Москва бундай таҳдидларни қарама-қаршилик қадамлари сифатида қабул қилишини айтди. Унинг фикрича, бу Россиянинг жавоб чораларига сабаб бўлади.

Москва санкцияларни ноқонуний деб ҳисоблайди. Европа Иттифоқи 17 ва 18-чи санкциялар пакетини киритганидан сўнг, Россия Киевга ёрдам кўрсатишга масъул бўлган бир қатор Ғарб фуқароларига киришни тақиқлади.