Ўзбекистон Афғонистонга инсонпарварлик ёрдами жўнатди
Ёрдам озиқ-овқат маҳсулотлари, дори-дармон ва тиббий буюмларни ўз ичига олади. Афғонистон шарқидаги зилзилада камида 2,2 минг киши ҳалок бўлгани айтилганди.
Ўзбекистон Афғонистонга инсонпарварлик ёрдами юборди. Бу ҳақда Сурхондарё вилояти ҳокимлиги хабар берди.
Ёрдам минглаб инсонлар ҳалок бўлган даҳшатли зилзиладан жабр кўрган аҳоли учун юборилган.
Жумладан, озиқ-овқат маҳсулотлари, дори-дармон ва тиббий буюмлар ортилган 300 тоннага яқин юк Ўзбекистон халқи номидан Балх вилоятига етказилди.
Юк таркибида ун, гуруч, шакар, тушёнка, макарон, қандолат маҳсулотлари, ёғ, тез тайёрланадиган таомлар, қизил ловия ва мош, қадоқланган ичимлик суви, 5 мингта ёпинчиқ ҳамда 10 тоннага дори воситалари бор.
Даҳшатли зилзила
Афғонистонда сўнгги йиллардаги энг кучли зилзилалардан бирида 2200 киши ҳалок бўлган. Ҳодиса 31 август куни Афғонистон шарқида кузатилди, 6,0 магнитудани ташкил этди.
Ҳалок бўлганларнинг катта қисми тоғли Кунар вилоятидан бўлган. У ерда "Толибон" ҳукумати 2205 киши ҳалок бўлгани ва камида 3640 киши яраланганини айтмоқда.
Қўшни Нангарҳор ва Лағмон вилоятларида яна 12 киши ҳалок бўлди, юзлаб одамлар яраланди.
Қидирув-қутқарув операциялари чоғида вайрон бўлган уйлардан юзлаб жасадлар топилди, дейди ҳукумат вакиллари. Улар қутқарувчилар ва кўнгиллилар вайроналарни тозалашда давом этаётганини қўшимча қилишган.