Шароф Рашидов тумани ҳокими пора билан ушланди
Сўнгги йилларда ҳокимларнинг бундай қўлга тушиши илк бор кузатиляпти.
Жиззах вилояти Шароф Рашидов тумани ҳокимлиги бош мутахассиси қурилиш соҳасида фаолият юритувчи МЧЖ раҳбарининг ишончига кириб, унга туман ҳокимининг тегишли қарори билан “Токчилик” МФЙ ҳудудида умумий ўрта таълим мактаби биносини барпо этиш учун ажратилган 1,7 гектар ер майдонида 8 та кўп қаватли уйлар қурилишига рухсат олиб бериши эвазига 30 минг доллар талаб қилган.
Жорий йилнинг 5 июл куни бош мутахассис сўралган пул маблағидан 10 минг долларини олиб, туман ҳокими М.Холбўтаевга берган. 8 июл куни эса тадбиркордан қолган 20 минг долларни ҳам олган ва унга кўп қаватли уй қуриш учун ҳоким томонидан рухсат берилган ҳужжатларни тақдим этган.
Сўнгра бош мутахассис ҳокимият биноси олдида туман раҳбари билан учрашиб, 10 минг долларни берган вақтида Давлат ҳавфсизлик хизмати ходимлари томонидан ушланган.
Ҳозир Ш.Рашидов тумани ҳокими депутатлик дахлсизлик ҳуқуқидан маҳрум қилиниб, унга нисбатан Жиноят кодексининг 210-моддаси билан, бош мутахассисга эса Жиноят кодексининг 168 ва 211-моддалари билан жиноят иши қўзғатилган.
Маълумот учун, бир йил олдин туман ҳокими "Дўстлик" ордени билан тақдирланган эди.