"Манчестер Сити" эгалари Ўзбекистон клубини сотиб олиши мумкин
Бундан ташқари улар яна бир ўзбек футболчисини "Сити"га жалб этиш ниятида.
Англиянинг "Манчестер Сити" футбол клуби эгалари Ўзбекистон клубини сотиб олиши мумкин.
Портфелида “Манчестер Сити” ва яна 12 та жамоа бўлган City Football Group компанияси Ўзбекистондан клуб сотиб олиш имкониятини кўриб чиқмоқда. Бу ҳақда МОҚ раҳбари биринчи ўринбосари Отабек Умаров маълумот берди.
Инглиз жамоаси яна бир ўзбекистонлик футболчини клубга таклиф этиш ниятида.
“Манчестер Сити” футбол клубига эгалик қилувчи компания Ўзбекистондаги футбол клубларидан бирини сотиб олиш имкониятини кўриб чиқмоқда.
Умаровнинг сўзларига кўра, ўзбекистонлик футболчи Абдуқодир Ҳусановнинг “Манчестер Сити”га ўтиши аллақачон инглиз клубига минтақадан миллионлаб янги мухлисларнинг қўшимча эътиборини тортган.
“Ҳусанов боргач, уларнинг фолловерлари 100 миллионга кўпайган. Ўзбекистонда 37−38 миллион халқимиз бўлса, Ўрта Осиёнинг бошқа давлатлари ҳам шу футболчимиз сабаб „Манчестер Сити“ жамоасини мунтазам равишда кузатиб бораётган мухлислари қаторига қўшилишди”, — деди Умаров.
City Football Groupнинг яна бир ўзбекистонлик футболчини таклиф қилиш ва ўзбек клубини халқаро гуруҳга қўшиш режалари бор.
“Ўзбекистондан бир спорт клубини, уларнинг ҳозирги гуруҳида 12 та спорт, футбол жамоаси бўлса, 13-командани, Худо хоҳласа, Ўзбекистондан олиш ниятида юришибди”, — деди у.
Эслатиб ўтамиз, Абдуқодир Ҳусанов айни дамда Клублар ўртасидаги жаҳон чемпионатида ўйнамоқда. У ушбу мусобақада қатнашган илк ўзбекистонлик бўлди.