Бойсундаги кондан яна водород сулфиди сизиб чиқди
Натижада газ оқими назорат остида ёқиб юборилди. Ҳолат яқин-атрофдаги аҳоли учун хавф туғдирмаслиги айтилмоқда.
5 май куни Сурхондарё вилоятидаги "Мустақиллик-25" кондаги 202-қудуқда таркибида водород сулфиди юқори бўлган газнинг катта босим билан отилиши ва натижада фонтанланиш ҳолатининг қайтадан кузатилиши рўй берди. Бу ҳақда Энергетика вазирлиги хабар берди.
Вазирликнинг маълум қилишича, таркибида водород сулфиди юқори бўлган газнинг тарқалишини олдини олиш мақсадида газ оқими назорат остида ёқиб юборилди.
Айни пайтда барча зарур тадбирлар хавфсизлик чораларига тўлиқ риоя қилинган ҳолда амалга оширилмоқда. Ҳодиса содир бўлган ҳудуд тегишли хизматлар томонидан ўраб қўйилган ва ҳозирги вақтда ушбу ҳудуд Фавқулодда вазиятлар вазирлиги, "Саноатконтехназорат" давлат инспекцияси ҳамда Очиқ нефть ва газ фаввораларининг олдини олиш ҳамда уларни бартараф этиш бўйича Ўзбекистон ҳарбийлаштирилган қисми мутахассислари томонидан доимий назоратда турибди.
Эслатиб ўтамиз, 2025 йил 27 март куни ҳам мазкур қудуқда таркибида водород сулфиди юқори бўлган газнинг чиқиши қайд этилганди.
Экологик хавфсизликни таъминлаш мақсадида қудуқ назорат остида ёқиб қўйилган. 22 апрел куни қудуқ ўқининг ғовланиб тушгани ва колонна чиқиб кетиши натижасида фонтанланиш тўхтаган, ҳодиса жойида газнинг суст оқими (грифон) кузатилган эди.
Аварияни бартараф этиш мақсадида ҳодиса жойида "Ўзбекнефтгаз" АЖ мутахассислари ҳамда хориждан жалб этилган мутахассислар ҳам фаолият олиб бормоқда.
Ҳар бир ҳолат бўйича қўшимча маълумотлар бериб борилади.
