"Титаник" ҳалокатида тирик қолган йўловчи мактуби рекорд нархда сотилди

"Титаник" ҳалокатидан омон қолган кишининг мактуби аукционда 300 минг еврога сотилди ва рекорд ўрнатди.

Тарихий мактубни америкалик коллекционер харид қилгани маълум қилинди. Бироқ унинг шахси тўлиқ очиқланмади.

Тарихий буюм жорий йилнинг 26 апрел куни Англиянинг Уилтшир графлигининг Девизес шаҳридаги "Henry Aldridge and Son аукцион уйида кутилган нарх — 60 минг евродан беш баравар юқори баҳога сотилди.

"Титаник" кемасининг биринчи тоифа йўловчиси, полковник Арчибалд Грейси томонидан ёзилган "Титаник ҳақидаги ҳақиқат" номли мактуби 300 минг еврога харид қилинди. Маълумки, мазкур фожиа оқибатида 1 500 киши ҳалок бўлган.

Мактуб унинг бортга чиққан санаси — 1912 йил 10 апрел билан бошланади. Ҳужжатга 11 апрел куни соат 15:45 да Куинстаунда (ҳозирги Корк, Ирландия) ва 12 апрель куни Лондонда почта тамғаси босилган.

Грейси ўз мактубида: "Бу кема жуда ажойиб, бироқ уни сафарни якунлагандан кейин баҳолайман", — деб ёзган.