ИЛМА иқтисодчи блогер устидан шикоят киритди

Истиқболли лойиҳалар миллий агентлиги иқтисодчи блогер Отабек Бакиров устидан ички ишлар органларига шикоят киритган. Агентлик постда "обрўсизлантириш" аломатлари бор деб ҳисоблаган.

"Шикоятни агентлик раҳбари биринчи ўринбосари В.Пак имзолаган. Шикоятга агентлик ишончли вакилининг тушунтириш хати илова қилинган. Ариза ҳозирда пойтахт ИИБ Киберхавфсизлик бўлинмаси томонидан ўрганилмоқда. Кеча оқшом чақирув бўйича терговга дастлабки тушунтиришларни ёзма ва оғзаки тарзда тақдим этдим (иш бўйича ҳужжатлардан нусха ҳали берилмади)", деб ёзган Бакиров.

"Қонунсиз суперрегулятор" пости TEMU электрон савдо платформаси фаолиятини чеклаш қарори эълон қилинган 2025 йил 4 март куни ёзилган.

Постда Истиқболли лойиҳалар миллий агентлигининг Ўзбекистонда ҳеч бир қонунсиз суғурта, капитал, крипто-активлар ва электрон тижорат фаолиятининг регуляторига айланиб қолгани тилга олинади. Унинг фаолиятини тийиб турувчи, тартибга солувчи, манфаатлар тўқнашувини олдини олувчи бирон-бир қонун йўқлиги таъкидланган.

Агентлик бу борада бирор расмий изоҳ ёки муносабат бермаган.

Блогернинг эслатишича, 2017 йилда бу агентлик бутунлай бошқа вазифа ва мақсадлар учун тузилган.

"Айтайлик, Ўзбекистонда кўп иқтисодий ислоҳотларда маслаҳатчи бўлган Жаҳон банки сизларнинг фаолиятингиз қарорлар билан эмас, алоҳида махсус қонун билан тартибга солиниши керак, бусиз сизлар назорат қилаётган суғурта ва капитал бозоридан тортиб криптоактивлар ва электрон тижорат сегментларигача барқарор ўсиш бўлмайди, инвесторлар қизиқмайди, бозорлар бир қўлли ва монопол тарзда қолади, кучли ўйинчилар кучсизларини маъмурий йўллар билан йўқ қилади, регуляторнинг мустақиллиги таъминланмайди, деб хулоса берса, Агентлик уларниям мени обрўсизлантирдинг, деб маҳкамага берадими?", деб хулоса қилган блогер.

Сўнгги пайтларда оммавий ахборот воситаларини уларнинг танқиди учун судга бериш, шикоят қилиш ҳолатлари кўп учрамоқда.