Масжид портлаши қурбонлари сони яна биттага кўпайди

Избоскан туманидаги масжид портлашида ҳалок бўлганлар сони 4 кишига етди. Бу ҳақда Platina.uz манбаси хабар берди.

Маълум бўлишича, тўртинчи жасад кеча кечқурун вайроналар орасидан чиқариб олинган.

Бугун Ўзбекистон мусулмонлари идораси раиси, муфтий Шайх Нуриддин Холиқназар Андижон вилоятидаги туман-шаҳар бош имом-хатибларининг масжидларда хавфсизлик техникасига риоя қилишга бағишланган тезкор йиғилиш ўтказди.

Йиғилишда Избоскан туманидаги масжид таҳоратхонасида бўлгани каби бахтсиз ҳодисаларнинг олдини олиш, масжид маъмуриятининг масъулиятини ошириш, ҳар бир объект ва техник хизмат кўрсатиш қурилмаларига алоҳида жавобгар шахс тайинлаш юзасидан кўрсатмалар берди.

Эслатиб ўтиш керак, кеча Аҳмадали Ҳожи жомеъ масжидида газ портлаган. Оқибатда 3 киши ҳалок бўлган, 10 киши жароҳатланган.

Ушбу ҳодиса бўйича жиноий иш очилган.