platina.uz

Мянмадаги аянчли зилзилада 700 нафарга яқин киши ҳалок бўлди

АҚШ Геология хизмати ер силкинишларини Рихтер шкаласи бўйича 7,7 ва 6,4 магнитудада баҳолади. 

Жаҳон
5 кун аввал, 9:36
Мянмадаги аянчли зилзилада 700 нафарга яқин киши ҳалок бўлди

Мянмадаги кучли зилзила оқибатида камида 694 киши ҳалок бўлди, 1670 киши жароҳатланди, деб хабар бермоқда AFP агентлиги мамлакат ҳарбий маъмуриятига асосланиб.

Қутқарув ишлари давомли зилзилаларга қарамай тун бўйи давом этди.

28 март, жума куни Мянмада Рихтер шкаласи бўйича 7,7 ва 6,4 магнитудали зилзилалар содир бўлди, деб хабар берди АҚШ Геология хизмати. Бангкокда қурилаётган осмонўпар бино қулади, кўплаб биноларга зарар етди. Таиланднинг ўзида ўндан ошиқ киши ўлгани айтилмоқда.

Мянма ҳукумати халқаро ҳамжамиятни зилзила оқибатларини бартараф этишда ёрдам беришга чақирди. Хитой ва Россия Мянмага аллақачон қутқарувчилар ва шифокорларни юборган.

Зилзила эпицентри Сагаинг шаҳридан 16 км шимоли-ғарбда жойлашган. Ерости силкинишлари Таиланд пойтахти Бангкок ва Мянма билан чегарадош Хитойнинг Юннан ва Гуанси провинцияларида ҳам сезилган.

Ижтимоий тармоқларда Бангкокдан осмонўпар биноларнинг чайқалаётгани ва томларидаги ҳовузлардан сув тўкилаётгани акс этган видеолар пайдо бўлди.

Шаҳарда қурилаётган кўп қаватли бино ҳам қулаб тушди. Натижада, расмийларга кўра, дастлаб камида уч киши ҳалок бўлган ва 50 киши жароҳатланган. Вайроналар остида 81 киши қолиб кетган.

Мянманинг энг йирик шаҳарларидан бири Мандалайда бир қанча бинолар қулаб тушди, дея хабар бермоқда Reuters.

© 2025 Platina.uz. Барча ҳуқуқлар ҳимояланган. «Platina.uz» сайтида жойланган маълумотлар муаллифнинг шахсий фикри. Сайтда жойланган ҳар қандай материаллардан ёзма рухсатсиз фойдаланиш тақиқланади.
Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги томонидан 02.12.2022 санасида №051412 сонли гувоҳнома билан ОАВ сифатида рўйхатга олинган.
Platina.uz сайтида реклама жойлаштириш масаласида +998 97 022 01 10 телефон рақамига (Telegram: Platina PR) мурожаат қилинг. Таҳририят билан алоқа: info@platina.uz
18+