Хусийлар Исроил пойтахтига гипертовушли ракета билан зарба берди
Бунга яҳудий армиясининг Ғазода урушни қайтадан бошлаши сабаб бўлган.
Яманнинг "Ансор Аллоҳ" (ҳусийлар) ҳаракати Тел-Авив аэропортига гипертовушли баллистик ракета учиргани ҳақида хабар берди.
Ҳаракатнинг таъкидлашича, ракета "ўз вазифасини бажарган". Исроил буни рад этиб чиқди.
" Биз ишғол қилинган Яффа ҳудудидаги Бен Гурион аэропортига “Фаластин-2” гипертовушли баллистик ракетаси билан зарба бердик”, — дейилади ҳаракат қуролли кучларининг Х ижтимоий тармоғида.
Хусийлар, шунингдек, Исроилга ракета отишни давом эттиришларини айтди. Улар Бен Гурион аэропортини парвозлар учун хавфли деб атади.
Исроил мудофаа кучлари ҳусийлар гипертовушли ракета учирганини тасдиқлади. Бироқ ҳаво кучлари уни мамлакат ҳаво ҳудудига кирмасдан туриб уриб туширган.
21 мартга ўтар кечаси ҳам ҳусийлар Тел-Авив яқинидаги ҳарбий объектга гипертовушли ракета зарбаси берилганини ҳам эълон қилди. Ҳаракат мамлакат расмийларининг Ғазо секторидаги ҳарбий амалиётларни давом эттириш қарори фонида Исроилга қарши ҳужумларни қайта бошлади.
