Трамп Эронга икки ой муҳлат берди
АҚШ президенти Эрондан янги ядровий келишув бўйича музокаралар олиб боришни талаб қилган ва таклиф рад этилса оқибатлари ҳақида огоҳлантирган.
Президент Доналд Трамп Эронга АҚШ билан янги ядровий келишувга эришиш учун икки ой вақт берди.
Бу ҳақда АҚШ президентининг ўтган ҳафта Эрон олий раҳнамоси Оятуллоҳ Али Хоманаийга юборган мактубида айтилган, дея хабар беради Axios америкалик расмийлар ва яна икки манбага асосланиб.
Нашрнинг ёзишича, Доналд Трампнинг мактуби таҳдидли бўлган. Унда АҚШ президенти янги ядровий келишув бўйича музокаралар олиб боришни талаб қилган ва унинг таклифи рад этилса, оқибатлари ҳақида огоҳлантирган.
Axios таъкидлаганидек, мактубда Трамп очиқ музокараларни истамаслигини айтди ва битим тузиш учун икки ойлик муддатни кўрсатди. Хабарда бу мактуб олинганидан кейин ёки музокаралар бошланганидан кейинги вақтга тегишли эканлиги аниқ эмас.
Нашр манбаларига кўра, Оқ уй мактуб мазмуни ҳақида АҚШнинг бир қанча иттифоқчилари: Исроил, Саудия Арабистони ва БААни хабардор қилган.
Оқ уй ва Эроннинг БМТдаги миссияси бу маълумотга изоҳ беришдан бош тортди, деб ёзади журналистлар.
Доналд Трамп январ ойида Оқ уйга қайтганидан бери Теҳрон билан янги ядровий келишувга интиляпти. 12 март куни Али Хоманаий мактубни олганидан кейин Трампнинг музокаралар таклифини “алдаш” деб атади.
