Озарбайжон ва Арманистон тинчлик шартномасини имзолашга келишди
Улар икки масала бўйича тортишиб келаётганди. Шулардан бири ҳудудий даъволар билан боғлиқ.
Озарбайжон ва Арманистон тинчлик шартномаси имзолашга тайёрлигини тасдиқлади.
"Озарбайжон ва Арманистон ўртасидаги тинчлик битими матни бўйича музокаралар жараёни аллақачон якунланди", деди Озарбайжон ташқи ишлар вазири Жейҳун Байрамов. Вазир журналистларга барча масалалар бўйича келишиб олинганини қўшимча қилди.
Озарбайжоннинг APA ахборот агентлигининг ёзишича, келишиб олинмаган нуқталардан бири халқаро миқёсда бир-бирига даъво қилмаслик бўлса, иккинчиси Озарбайжон ва Арманистон чегарасига бошқа давлат вакилларини жойлаштирмаслик эди.
Кейинроқ тинчлик шартномасининг тайёрлиги Арманистон ташқи ишлар вазирлиги томонидан тасдиқланди.
“Арманистон Ташқи ишлар вазирлиги “Арманистон Республикаси ва Озарбайжон Республикаси ўртасида тинчлик ва давлатлараро муносабатларни ўрнатиш тўғрисида”ги шартнома лойиҳаси маъқулланганлиги ва лойиҳани тасдиқлаш бўйича музокаралар якунлангани фактини тасдиқлайди. Шундай қилиб, тинчлик шартномаси имзоланишга тайёр. Арманистон Республикаси Озарбайжон Республикаси билан Битимни имзолаш вақти ва жойи бўйича маслаҳатлашувларни бошлашга тайёр”, — дейилади мамлакат ТИВ баёнотида.
Арманистон бош вазири Никол Пашинян битим имзолаш вақти ҳақида гапирар экан, шундай деди:
“Биз шартнома имзолашга тайёрлигини, имзоланиш санаси ва жойи бўйича муҳокамаларни бошлашга тайёрмиз. Озарбайжон Ташқи ишлар вазирлиги икки томонлама форматдаги музокараларни бошлашга тайёр эканликлари ҳақида баёнот берди. Уларнинг ўз ғоялари бор, бизда эса ўзимизники бор ва бу муҳокамалар давомида биз бу ғояларни бир-бирига уйғунлаштиришга ҳаракат қиламиз, деб ўйлайман”.
