Субсидия учун аризалар топшириш 3 мартдан бошланади

Ипотека кредитлари бўйича субсидиялар тўлаш дастури бўйича аризалар топшириш 3 мартдан бошланади. Бу ҳақда Иқтисодиёт ва молия вазирлиги хабар берди.

Ўзбекистон Республикаси Президентининг 2025-йил 21-февралдаги “Уй-жой ва ипотека бозорини янада ривожлантиришга оид қўшимча чора-тадбирлари тўғрисида”ги ПФ–26-сонли Фармони қабул қилинди.

Ушбу Фармон билан жорий йилда ипотека кредитлари бўйича субсидиялар тўлашнинг мақсадли кўрсаткичлари тасдиқланган бўлиб, ипотека кредитлари бўйича субсидиялар сони ўтган йилгига нисбатан 1,5 бараварга оширилди. Дастур доирасида 30 000 нафар талабгорларга ипотека кредитлари бўйича субсидиялар ажратиш белгиланмоқда.

Бунда, ипотека кредитлари бўйича субсидиялар тўлашнинг тасдиқланган мақсадли кўрсаткичлари доирасида аризалар қабул қилиш 2025 йилнинг 3 март куни соат 09:00 да бошланади.

Фуқароар Давлат хизматлари марказларига бевосита борган ҳолда ёки “my.gov.uz” Ягона интерактив давлат хизматлап порталида мазкур ҳавола орқали мустақил равишда ариза топшириши мумкин.

Эслатма: ариза берувчи ва/ёки унинг яқин қариндошларинг (бунда, яқин қариндошлар аризада кўрсатилган ҳолларда) ўртача даромад миқдори:

Қорақалпоғистон Республикаси ва вилоятларда — меҳнатга ҳақ тўлашнинг энг кам миқдорининг 2,7 бараваридан (3 млн 118 минг 500 сўм) 8 бараваригача (9 млн 240 минг сўм);

Тошкент шаҳрида — меҳнатга ҳақ тўлашнинг энг кам миқдорининг 2,7 бараваридан (3 млн 118 минг 500 сўм) 9,2 бараваригача (10 млн 626 минг сўмгача) бўлиши зарур.

Ариза берувчида, шу жумладан, унинг турмуш ўртоғининг номида республиканинг барча ҳудудлари миқёсида мулк ҳуқуқи билан турар жой мавжуд бўлмаслиги лозим.