Ўзбекистон ўз фуқароларини хавфсиз депортация қилишда АҚШ билан ҳамкорлик қилмоқда
Ушбу фуқаролар ватанга Ню-Йорк-Тошкент йўналиши орқали қайтади, дея билдирди ТИВ матбуот котиби Аҳрор Бурҳонов.
АҚШ ҳукумати томонидан депортация қилинаётган Ўзбекистон фуқаролари ватанга Ню-Йорк-Тошкент йўналиши орқали қайтади. Бу ҳақда ташқи ишлар вазирининг матбуот котиби Аҳрор Бурҳонов маълум қилди.
Бурҳоновнинг “Дунё” ахборот агентлигига маълум қилишича, Ўзбекистоннинг Вашингтондаги элчихонаси ва Нью-Йоркдаги Бош консулхонаси узоқ йиллардан буён Ўзбекистон фуқароларининг ўз ватанларига хавфсиз депортациясини таъминлаш мақсадида АҚШнинг тегишли ҳуқуқ-тартибот идоралари билан яқиндан ҳамкорлик қилиб келмоқда.
"Бизнинг келишувларимизга асосан, Америка томони депортация қилинадиган фуқароларимизнинг ҳар бир ҳолати ҳақида тезкорлик билан хабардор қилади. Ўрнатилган амалиётга кўра, фуқароларимиз ватанга Нью-Йорк-Тошкент йўналиши орқали қайтади”, дейди у.
Дипломатик ваколатхоналар Америка томонидан бошқа давлатларга депортация қилиниши мумкинлиги ҳақида маълумот беришни сўраб мурожаат қилди. Бундан ташқари, бу борада Лотин Америкаси давлатлари билан дипломатик каналлар орқали ҳам алоқалар ўрнатилган.
"Дипломатик ваколатхоналаримиз Ўзбекистоннинг барча фуқароларига, улар қаерда бўлишидан қатъи назар, ҳар томонлама ёрдам кўрсатади", дейди Ташқи ишлар вазирлиги расмий вакили.
Аввалроқ Ўзбекистон фуқаролари АҚШдан Панамага депортация қилингани маълум бўлганди.
