Тошкентнинг эски шаҳри сайёҳларга мослаштирилади
Шавкат Мирзиёев пойтахтнинг туризм салоҳиятига бағишланган тақдимот билан танишди.
Тошкентнинг эски шаҳар ҳудуди сайёҳлар учун мослаштирилиб, зарур инфратузилмалар қурилади.
Президент Шавкат Мирзиёев Ислом цивилизацияси марказида пойтахтнинг туризм салоҳиятига бағишланган тақдимот билан танишди.
Жумладан, эски шаҳарда гастрономик ва туризм кўчаларини ташкил этиш режалаштирилган. Бунинг учун 17 та кўча ва 32 та берк кўча танлаб олинган. Уларда Эски шаҳарнинг ўзига хос меъморий қиёфасини сақлаб қолган ҳолда, қўшимча инфратузилмалар яратилади.
Бунинг натижасида ҳудудда фаолият юритаётган тадбиркорлар сони 250 тага кўпаяди, 1 минг 500 та иш ўрни очилади. Муҳими, кунлик сайёҳлар сони ҳозирги 4 мингтадан 11 мингтага кўпайиши кутилмоқда.
Айни пайтда Бектемир, Мирзо Улуғбек, Миробод, Юнусобод, Яккасарой, Янгиҳаёт туманларида 7/24 тартибида ишлайдиган ўнлаб сайёҳлик манзиллари ташкил этилган.
