Лукашенко президентлик сайловида 86,8 фоиз овоз билан ғалаба қозонди

Беларусда 26 январ куни навбатдаги президентлик сайлови бўлиб ўтди.

Марказий сайлов комиссияси президентлик сайловларининг дастлабки натижаларини эълон қилди.

Марказий сайлов комиссияси раҳбари Игор Карпенконинг айтишича, сайловчиларнинг 86,82 фоизи амалдаги президент Александр Лукашенкога овоз берган.

РБК хабарига кўра, қолган номзодлар ўртасидаги овозлар қуйидагича тақсимланган:

Вакиллар палатаси (парламент қуйи палатаси) аъзоси, Либерал-демократик партия (ЛДП) етакчиси Олег Гайдукевич 2,02% овоз олди.

Тадбиркор, Вакиллар палатасининг собиқ аъзоси (2016–2019) Анна Канопатская (48 ёш), 2020 йилги президентлик сайловларида қатнашган — 1,86%.

2024 йил май ойидан буён Коммунистик партия Марказий қўмитасининг биринчи котиби, Вакиллар палатасининг собиқ аъзоси Сергей Сиранков – 3,21%.

Меҳнат ва адолат республика партияси раиси, Минск шаҳар кенгаши депутати Александр Хижняк – 1,74%.

Ғарб томони мазкур сайловлар эркин ва демокраатик эмаслигини таъкидлаб, натижаларни тан олмаслигини билдирганди.

Шу тариқа Беларусни 1994 йилдан бери бошқараётган Лукашенко яна лавозимда қолиши аниқ бўлди.