"Ўзсувтаъминот" Ховосдаги сифатсиз сув ҳақидаги хабарни рад этди

"Ўзсувтаъминот" Рақобат қўмитаси эълон қилган хабарга муносабат билдирди.

Ховос туманида ичимлик сувининг сифати талабга жавоб бермаслиги ва аҳоли билан қайта ҳисоб-китоб қилингани хабар берилганди.

Ҳолат юзасидан Ховос тумани санитария-эпидемиология хизмати ва Сирдарё вилояти ҳудудий Қурилиш ва уй-жой коммунал хўжалиги соҳасида назорат қилиш инспекцияси ҳамкорлигида ўрганишлар ўтказилган. Ўрганиш натижасида “Ховособод”, “Гулбаҳор”, “Қаҳрамон”, “Мустақилликнинг 25 йиллиги”, “Оқчангал” маҳалла фуқаролар йиғини ҳамда уларнинг айрим кўчаларидаги хонадонлар ва мактабларда ичимлик сувининг сифатига доир текширувлар ўтказилган.

Жумладан:

• Тотувлик кўчаси, 45-уй,

• Зомин кўчаси, 66-уй,

• Гулбаҳор МФЙ, 6-сонли мактаб,

• Нурчилар кўчаси, 12-уй,

• “Мустақилликнинг 25 йиллиги” МФЙ, 17-мактаб,

• Олчазор кўчаси, 32-уй,

• Обод кўчаси, 36-уй.

Ўтказилган дастлабки лаборатория таҳлиллари натижасида айрим кўрсаткичлар белгиланган меъёрлардан юқори эканлиги қайд этилган. Шу асосда, Ховос тумани санитария-эпидемиология хизмати томонидан ишчи гуруҳи ташкил этилди ва юқорида қайд этилган ҳудудларда ичимлик суви тизимларини ювиш ва дезинфекция қилиш ишлари амалга оширилди.

Кўрилган чоралардан сўнг, ушбу ҳудудлардан қайтадан намуна олиниб, лаборатория таҳлиллари ўтказилди.

Қайта текширувлар натижаларига кўра, ичимлик суви сифати санитария-гигена талабларига тўлиқ жавоб бериши ва аҳоли томонидан фойдаланиш учун яроқли эканлиги тасдиқланган.

"Шу муносабат билан айрим манбаларда Ховос тумани ичимлик сувининг сифати ҳақида тарқатилган салбий маълумотлар ҳақиқатга мос эмаслиги, ҳозирги вақтда ҳудудларда ичимлик суви санитария-эпидемиология меъёрларига тўлиқ мос келиши маълум қилинади", дейилади "Ўзсувтаъминот" муносабатида.