"Манчестер Сити" Ҳусанов ҳақида ўнта фактни эълон қилди

"Манчестер Сити" расмий сайтида янги футболчи Абдуқодир Хусанов ҳақида ўнта муҳим маълумот эълон қилинди.

Ҳусановнинг трансфери 20 январ куни маълум қилинди.

1. Премьер лигадаги илк ўзбек футболчиси

Хусанов Премьер-лигада ҳамда “Сити”да ўйнаган биринчи ўзбекистонлик футболчига айланади. У шу орқали Англияда ўйнаган 118-миллат ўйинчиси бўлди.

Бундан аввал “Вест Бромвич”, “Кардифф” ва “Сток” клубларида ўйнаган Питер Одемвингие ҳам Тошкентда туғилган, бироқ халқаро миқёсда Нигерия шарафини ҳимоя қилган.

2. Узоқ йўл

Абдуқодир Тошкентда туғилган ва “Бунёдкор”нинг ёшлар жамоасида ўйнаган. Кейин у Беларуснинг “Энергетик-БГУ” жамоасига ўтиб, у ерда катта футболдаги илк ўйинини “Витебск”га қарши ўтказган. Ўйин 3:1 ҳисобида тугаган.

37 та ўйиндан кейин Хусанов “Ланс”га ўтди ва Франция клуби учун 31 марта майдонга тушди.

3. Камдан-кам учрайдиган туғилган кун

Абдуқодир 2004 йил 29 февралда туғилган. Бу санада туғилиш эҳтимоли 1461 тадан биттани ташкил этади.

Қизиқ, “Сити” собиқ ҳужумчиси Ферран Торрес ҳам шу куни, лекин тўрт йил аввал туғилган. Уларнинг навбатдаги расмий туғилган куни учун яна уч йил кутишга тўғри келади!

4. “Олтин бола” совринига номзод

2024 йилда Хусанов “Олтин бола” совринига номзод бўлди. У билан бирга “Сити” футболчилари Рико Льюис ва Савиньо ҳам рўйхатда эди.

Бу мукофот 21 ёшгача бўлган энг яхши футболчига топширилади. 2024 йил ғолиби “Барселона” футболчиси Ламин Ямал бўлди.

5. Ота изидан

Абдуқодирнинг отаси Ҳикмат Ҳошимов ҳам футболчи бўлган. У Ўзбекистон миллий жамоаси учун 12 та ўйин ўтказган. Абдуқодир эса миллий жамоа учун 6 та ўйин ўтказишга улгурган.

Ҳикмат Ҳошимов 2009/10 йилги мавсумда “Бунёдкор” билан Ўзбекистон чемпиони ва Кубогини қўлга киритган. Кейинчалик ўғли ўйнаган ёшлар жамоасида мураббий бўлган.

6. Жаҳон чемпионатига чорлов

Ўзбекистон ҳалигача жаҳон чемпионатида иштирок этмаган, бироқ 2026 йилги ЖЧ саралаш босқичида жамоа яхши натижаларга эришмоқда.

ОФКнинг A гуруҳида Ўзбекистон иккинчи ўринда кетмоқда. Гуруҳдаги икки жамоа плей-оффга йўлланма олади.

7. Миллий шараф

Абдуқодир Ўзбекистоннинг 17, 19, 20, 23 ёшлилар жамоаларида ва катталар жамоасида мамлакат шарафини ҳимоя қилган.

2024 йилги Париж Олимпиадасида қатнашган бўлса-да, Ўзбекистон гуруҳ босқичидан чиқа олмаган.

8. Ёшлар ўртасидаги Осиё Кубоги ғолиби

Абдуқодир 2024 йилги 20 ёшлилар ўртасидаги Осиё Кубогида ғолиб чиққан Ўзбекистон терма жамоаси таркибида бўлган. Улар финалда Ироқни 1:0 ҳисобида мағлуб этган.

Бу ғалаба билан Ўзбекистон ёшлар ўртасидаги жаҳон чемпионатига йўл олган ва 1/8 финалгача етиб борган.

9. Бир нечта тилда сўзлаша олади

20 ёшли футболчи ўзбек ва рус тилларида бемалол гапиради. Францияда яшаган вақтда француз тилини ўрганган.

Франциядаги энг яқин дўсти эквадорлик футболчи, испан тилида сўзловчи Хоаннер Чавес бўлган. Бу эса Пеп Гвардиолага футболчига ўз фикрини тушунтиришни анча осонлаштиради.

10. Ватандан узоқда

Тошкент шаҳри Манчестердан тахминан 5600 километр узоқликда жойлашган. Вақт фарқи эса беш соатни ташкил қилади.