Илҳом Алиев Арманистонни Жанубий Кавказдаги хавф манбаи деб атади

Озарбайжон президенти Илҳом Алиев Арманистонни Жанубий Кавказ учун таҳдид манбаи эканини айтди.

“Арманистонни қуроллантириш фақат янги кескинликка олиб келади, биз Арманистоннинг аслида минтақа учун таҳдид манбаи бўлишини хоҳламаймиз”, деди Алиев Озарбайжон телеканалларига берган интервюсида.

Унинг сўзларига кўра, Ереван Озарбайжон Арманистон учун хавф манбаи эмаслигини тушуниши керак.

"Биз Жанубий Кавказда тинчлик ва ҳамкорлик бўлишини истаймиз, улар бизнинг ишларга аралашмасин. Улар Туркия ва Озарбайжон ўртасида географик тўсиқ бўлмасликлари керак. Зангезур йўлаги очиқ бўлиши керак ва шундай бўлади. Улар буни қанчалик тезроқ тушунишади, шунча яхши", - дея қўшимча қилди Озарбайжон президенти.

Алиев Арманистон қуролланишни зудлик билан тўхтатиши кераклигини ҳам айтди.

"Франция ва унга қурол етказиб берувчи бошқа давлатлар бу шартномаларни бекор қилишлари керак, бу бизнинг шартимиз", деди у.

Тинчлик шартномаси бўйича музокараларнинг бориши ҳақида Алиев, Ереван Боку шартларини қабул қилишига умид билдирди. "Чунки уларда ҳеч қандай фавқулодда нарса йўқ, Минск гуруҳини бекор қилиш, конституцияни ўзгартириш бусиз тинчлик шартномаси мумкин эмас", деди Озарбайжон президенти.

Унинг қўшимча қилишича, Арманистонга тинчлик шартномаси керак бўлмаса, Озарбайжонга ҳам керак эмас.