Шавкат Умрзоқов ҳокимлик харажатлари учун катта пул ажратди

Тошкент шаҳар ҳокими Шавкат Умрзоқов ҳокимлик биноси харажатлари, коммунал, интернет тўловлари ва бошқалар учун 7 млрд. 349 млн. сўмдан ошиқ маблағ ажратди. Бугун 26 март куни ҳокимнинг мазкур масала бўйича тегишли қарори эълон қилинди.

Қарор иловасида харажатлар бўйича тақсимот тақдим этилган. Жумладан, электр тўловлари учун 700 млн. сўм, табиий газ учун 400 млн. сўм ажратилади. Қўриқлаш хизмати харажатлари учун 3 млрд. 265 млн. сўм берилади.

Бундан ташқари хизмат автомобилларига ёқилғи қуйиш учун 690 млн. сўм, уларга техник хизмат кўрсатиш учун 150 млн. сўм ажратилиши кўзда тутилган. Мажлис заллари учун гилам харид қилишга 100 млн. сўм берилади, махсус VIP учун мебеллар жамланмасига 150 млн. сўм, лифтларга хизмат кўрсатиш 62 млн., уларни кўрикдан ўтказишга эса 4 млн. сўм кўзда тутилган. Ҳудуд атрофини ободонлаштириш ва гул экишга 80 млн. сўм, санитария, гигиена ва тозалаш воситалари учун 70 млн. сўм, сувенир ва эсдалик совғалари учун 34 млн. сўм, гулдасталар учун 60 млн. сўм, аудиоселектор хизматига 62 млн. сўм ажратилади.

Аввалроқ Умрзоқов ИИББ учун ер, шунингдек, тошқинларга қарши ҳам маблағ ажратганди.