Ўзбекистон бўйлаб 2 мингга яқин ноқонуний чиқиндихоналар аниқланди

Ўзбекистонда қарийб 2 минг ноқонуний чиқиндихоналар аниқланди. Бу ҳақда Ўзбеккосмос агентлиги хабар берди.

Жорий йилнинг бугунги кунига қадар агентлик томонидан экология йўналишида олиб борилган космик мониторинг натижалари эълон қилинди.

Унга кўра, Республиканинг қарийб 721 гектар майдонида 1 минг 928 та ноқонуний чиқиндихона мавжуд эканлиги аниқланди. Улардан 123 таси яъни 255,5 гектари чиқинди сақлаш полигонлари чегарасидан ташқарига чиқиш, 1 805 таси 465,2 гектари эса ноқонуний чиқинди полигонлари сифатида қайд етилмоқда.

Хусусан, Қорақалпоғистон Республикасида 243 та (63,2 гектар), Хоразм вилоятида 168 та (22 гектар), Бухоро вилоятида 92 та (91,7 гектар), Навоий вилоятида 216 та (112,4 гектар), Самарқанд вилоятида 147 та (41,2 гектар), Қашқадарё вилояти 81 та (79,3 гектар), Андижон вилояти 180 та (42 гектар), Наманган вилоятида 195 та (65,2 гектар), Фарғона вилоятида 164 та (51 гектар), Тошкент вилоятида 363 та (98,6 гектар), Жиззах вилоятида 39 та (30,44 гектар) ва Сурхондарё вилоятида 40 та (20,11 гектар).

Бу каби ноқонуний чиқинди полигонларининг ташкил этилиши аввало атроф муҳит ва экологияга катта салбий таъсир ўтказиб, тупроқ, сув ва ҳаво сифатига салбий таъсир кўрсатади. Қолаверса, зарарли ҳашаротлар кўпайиши, инфекцион касалликларнинг ортиши, инсонларда ўпка саратони ва нафас олиш нуқсонларининг ривожланишига олиб келади.