“Орзу” болалар танлови ғолиблари муносиб тақдирланди

Бир ҳафта мобайнида қизғин баҳс-мунозараларга бой тарзда ўтган мазкур танловга 2153 та ариза рўйхатдан ўтказилди. Танловда иштирок этиш истагини билдирган 6 ёшдан 14 ёшгача бўлган болалар уч ёш тоифасида (6–8 ёш, 9–11 ёш ва 12–14 ёш) ўзаро беллашди.

Иштирокчилар 6 йўналишда — вокал (миллий ва академик ижро, эстрада, фольклор ҳамда хор гуруҳлари бўйича), адабиёт йўналиши иштирокчилари назм (шеър, ғазал, достон) ҳамда наср (ҳикоя ва эртаклар), классика (фортепиано, торли-камонли, дамли ва зарбли чолғу асбоблари), рақс (миллий, балл ҳамда замонавий рақслар), чолғу (плекторли, камонли, дамли ва зарбли чолғу асбоблари) ҳамда тасвирий ва амалий санъат каби йўналишларда иштирок этди.

Ҳар бир йўналиш шаффоф ўтиши учун Ўзбекистон давлат консерваторияси, Ботир Зокиров номидаги Миллий эстрада санъати институти, Ўзбекистон давлат хореография академияси, Алишер Навоий номидаги Тошкент давлат ўзбек тили ва адабиёти университети ҳамда Камолиддин Беҳзод номидаги Миллий рассомлик ва дизайн институтидан малакали мутахассислар жалб қилинди.

Якунда икки мингдан зиёд иштирокчидан 50 нафар истеъдодли болалар совриндорликни қўлга киритди.

Тақдирлаш маросимида Тошкент шаҳар ҳокими ўринбосари Дурдона Раҳимова совриндор болаларни самимий табриклаб, ғолибларни диплом, статуэтка ва қимматбаҳо совғалар билан тақдирлади.

Ушбу ҳаяжонли дақиқалар болаларга нафақат қувонч улашди, балки уларни янада сермаҳсул ижод қилишга руҳлантирди. Тақдирлаш маросимида болалар иштирокида намойиш этилган тантанали концерт дастури барчага байрамона кайфият улашди.