Ўзбекистон ва Қозоғистон Сирдарёда сувни ўлчаш тизимларини ўрнатадилар
Бундан ташқари, томонлар сув ресурсларидан оқилона фойдаланиш бўйича Минтақавий стратегияни ишлаб чиқишни муҳокама қилдилар.
Қозоғистон ва Ўзбекистон Сирдарёда 10 та ўлчаш станциясини аниқлади, уларда сувни автоматик ҳисобга олиш тизимлари ўрнатилади. Бу ҳақда Қозоғистон сув ва ирригация вазирлиги хабар берди.
Қозоғистон Сув хўжалиги ва ирригация вазири Нуржон Нуржигитов Ўзбекистон сув хўжалиги вазири Шавкат Ҳамраев билан учрашди. Томонлар икки томонлама ва минтақавий ҳамкорликнинг долзарб масалаларини муҳокама қилган.
Вазирлар ўлчаш станцияларини автоматлаштириш ва Сирдарёдаги сув ҳисобини рақамлаштириш масалаларини муҳокама қилдилар. Бугунги кунда Қозоғистон ва Ўзбекистон 10 та пункт бўйича келишиб олди, уларда замонавий сув ҳисоблагичларини ўрнатиш режалаштирилган. Нуржон Нуржигитов мазкур лойиҳани ҳамкорликда амалга ошириш юзасидан халқаро молия ташкилотлари ва компаниялари билан музокаралар олиб борилаётганини алоҳида таъкидлади.
Томонлар, шунингдек, Норин-Сирдарё каскади сув омборларининг келаси йилги суғоришдан олдинги мавсуми учун ишлаш режимларини ҳам муҳокама қилдилар. Марказий Осиё давлатлараро сув хўжалигини мувофиқлаштирувчи комиссиясининг навбатдаги йиғилишида сув омборларини ишга тушириш бўйича прогноз жадвали тузилади ва сув таъминоти ҳажмлари тасдиқланади.
"Ўзбекистонлик ҳамкасбларимга Оролни қутқариш халқаро жамғармаси йиғилишидаги фаол иштироки ва билдирилган таклифлар учун катта раҳмат. Ўтган бир йил давомида ҳамкорликдаги ишимиз ижобий натижалар бераётганига амин бўлдик, шу боис яқин икки томонлама ҳамкорликни давом эттириш ниятидамиз. Биз кўп масалалар бўйича умумий қарашларга эгамиз. Бу бизга мавжуд муаммоларнинг аксариятини ўзаро манфаатли асосда ҳал қилиш имконини беради".
– деди сув хўжалиги ва ирригация вазири Нуржон Нуржигитов.
Шавкат Ҳамроев, ўз навбатида, Ўзбекистон жамғарма доирасидаги ҳамкорликни кучайтириш истагини билдирди.
"Ўзбекистон Қозоғистоннинг Оролни қутқариш халқаро жамғармасига раислигини тўлиқ қўллаб-қувватлайди. Биз эса бу йўналишда ўзаро ҳамкорликни кучайтириб, биргаликда лойиҳалар устида ишламоқчимиз. Масалан, Сирдарё ва Амударё ҳавзалари экотизимларини сақлаш, маҳаллий аҳолини сифатли ичимлик суви билан таъминлаш, кичик ва маҳаллий сув ҳавзаларини тиклаш ва бошқалар".– деди Ўзбекистон сув хўжалиги вазири Шавкат Ҳамроев.
Бундан ташқари, томонлар сув ресурсларидан оқилона фойдаланиш бўйича Минтақавий стратегияни ишлаб чиқишни муҳокама қилдилар. Музокаралар якунида вазирлар учрашув баённомасини имзоладилар.
