Эрон олий раҳбари Исроилга "қаттиқ жазо" билан таҳдид қилди

Эрон ҲАМАС сиёсий бюроси раҳбари Исмоил Хониянинг ўлими учун Исроилга "қаттиқ жазо" билан таҳдид қилди. 

Эрон олий раҳнамоси Оятуллоҳ Али Хоманаий Исроил ХАМАС сиёсий бюроси раҳбарининг ўлдирилиши учун қаттиқ жазоланиши кераклигини айтди, деб ёзади РБК.

"Биз  оғир жазо учун замин яратишни ва Ислом Республикаси ҳудудида шаҳид бўлган одамнинг қони учун қасос олишни ўз бурчимиз деб биламиз", — деди Оятуллоҳ Али Хоманаий Исроил ва ҲАМАС сиёсий раҳбарининг ўлимига ишора қилиб.

Эроннинг яқинда сайланган президенти Масуд Пезешкиён ҳам  Теҳрон Хонияни ўлдирган "террорчи босқинчиларни қилмишидан пушаймон қилишини" айтган. Шу билан бирга, Эрон вице-президенти Амир Ҳусайн Ғозизода Ҳошимийнинг таъкидлашича, Фаластин қаршилик ҳаракати ҲАМАС етакчисининг ўлдирилишининг "айбдорларини жазолашга" тўлиқ ҳақли.

Эслатиб ўтамиз, ҲАМАС ҳаракати Сиёсий бюроси раҳбари Исмоил Ҳания ва унинг қўриқчиси Теҳронда ракета тушиши оқибатида ҳалок бўлди. ҲАМАСнинг билдиришича, Сиёсий бюро раҳбари Эроннинг янги президенти Масуд Пезешкяннинг бир кун аввал, 30 июль куни бўлиб ўтган инаугурация маросимида иштирок этган. 

Исроил мудофаа кучлари Ҳаниянинг ўлимига изоҳ беришдан бош тортди. Шу билан бирга, Исроилнинг Қуддус ва мерос ишлари бўйича вазири Амикай Элияху унинг ўлимини «дунёни ахлоқсизликдан тозалашнинг тўғри йўли» деб атади. The Times of Israel таъкидлаганидек, Элияху Ҳамас етакчисининг ўлдирилиши ортида Исроил турганига ишора қилган биринчи исроиллик юқори мартабали амалдор бўлди.

CNN таъкидлаганидек, Ҳания ХАМАСнинг халқаро алоқалари учун масъул бўлган ва ўт очишни тўхтатиш ва гаровга олинганларни озод қилиш бўйича музокараларнинг асосий иштирокчиларидан бири бўлган. Унинг ўлдирилиши аллақачон Фаластин миллий маъмурияти раҳбари Маҳмуд Аббос ҳамда Туркия, Эрон ва Россия ташқи ишлар вазирликлари томонидан қораланган. 

"Биз яна бир бор барча манфаатдор томонларни вазминлик кўрсатишга ва минтақадаги хавфсизлик билан боғлиқ вазиятнинг кескин ёмонлашувига олиб келиши ва кенг кўламли қуролли қарама-қаршиликни келтириб чиқариши мумкин бўлган қадамлардан сақланишга чақирамиз", — дейилади Россия ТИВ баёнотида.