Катта еттилик давлатлари Украинага 50 миллиард доллар ажратишга келишди
ОАВ маълумотларига кўра, кредит шаклидаги бу маблағ Россия активларидан тушадиган даромад ҳисобидан тўланади.
Катта еттилик мамлакатлари (Буюк Британия, Германия, Италия, Канада, Франция, Япония ва АҚШ) етакчилари Украинага 50 миллиард доллар маблағни кредит кўринишида ажратиш тўғрисида келишувга эришдилар, бу маблағ Россиянинг музлатилган активларидан олинган фойда ҳисобига тўланади.
Бу ҳақда Елисей саройидаги манбага таяниб, AFP ва Bloomberg ёзмоқда.
"Биз келишувга эришдик", деди AFP агентлигига манба. Bloomberg суҳбатдошининг аниқлик киритишича, келишувнинг техник тафсилотлари 13—14 июнь кунлари бўлиб ўтадиган G7 етакчилари саммитидан сўнг муҳокама қилинади. Бу борада якуний келишувларга маълум вақтдан кейин эришилади.
Bloomberg хабарига кўра, маблағларни Украинага 2024 йил охиригача ажратиш режалаштирилган. AFP манбасининг таъкидлашича, режа Россиянинг музлатилган активларидан олинган фойдадан фойдаланган ҳолда кредитни қайтаришни назарда тутсада, G7 муқобил вариантларни кўриб чиқиши керак.
"Агар у ёки бу сабабларга кўра Россия активлари музлатилмаган бўлса ёки Россия активларидан тушган маблағлар кредитни молиялаштириш учун этарли бўлмаса, биз кредит юкини қандай тақсимлаш ҳақида ўйлашимиз керак", деди агентлик суҳбатдоши.
Қўшма Штатлар Украинага Россия активларидан келадиган даромад билан 50 миллиард доллар ажратишни таклиф қилди. Эслатиб ўтамиз, 2022 йил 24 февралдан кейин Европа Иттифоқи, Канада, АҚШ ва Япония Россиянинг қарийб 300 миллиард долларлик активларини музлатиб қўйди. Шу билан бирга, ушбу маблағларнинг тахминан 5-6 миллиард доллари АҚШда сақланади. Европа - 210 миллиард доллар. Ҳар йили бу активлар 3-5 миллиард доллар фойда келтириши мумкин, дея қайд этади Bloomberg.
