Қурбон ҳайитида ўзбекистонликлар кетма-кет уч кун дам олади
Президентнинг байрам бўйича қарори эълон қилинди. Байрам 16 июн куни нишонланиши кутилмоқда.
![Қурбон ҳайитида ўзбекистонликлар кетма-кет уч кун дам олади](https://cp.platina.uz/media/CACHE/images/x0zMLD15677690529457_l_AkpOnGI.1cb116a1200d.webp)
Қурбон ҳайитида ўзбекистонликлар кетма-кет уч кун дам олади.
Президент Шавкат Мирзиёев “Муборак Қурбон ҳайитини нишонлаш тўғрисида”ги қарорни имзолади.
Қарорга кўра, 2024 йилда Қурбон ҳайитининг биринчи куни 16 июн – якшанбага тўғри келиши муносабати билан юртимизда 16 июн Қурбон ҳайити байрами сифатида нишонланади.
Қурбон ҳайитининг биринчи куни дам олиш кунига тўғри келиши муносабати билан ушбу дам олиш куни 17 июн – душанба кунига кўчирилади, 18 июнь – сешанба куни барча ходимлар учун қўшимча дам олиш куни бўлади.
Маҳаллий давлат ҳокимияти органлари, масъул вазирлик ва идораларга муборак Қурбон ҳайитини халқимизнинг миллий анъана ва урф-одатларига уйғун ҳолда ўтказиш учун тегишли чора-тадбирларни амалга ошириш, юртдошларимиз учун муборак Қурбон ҳайити кунларида мўътабар зиёратгоҳлар ва тарихий қадамжоларга зиёратларни ташкил этиш мақсадида қулай шароит ва имкониятлар яратиш топширилди, дейилади хабарда.