Эрон Исроилга дронлар ва ракеталар билан ҳужум қилди. Асосий маълумотлар

14 апрел тунида Эрон томонидан Исроилга 200дан ортиқ дронлар,  қанотли ва баллистик ракеталар учирилди. Исроил томони эса уларнинг барчаси уриб туширилганини маълум қилди.

Исроил мудофаа кучлари матбуот котиби контр-адмирал Даниэл Хагарийнинг айтишича, Эрон 200 дан ортиқ камикадзе дронлари, қанотли ракеталар ва баллистик ракеталар учирган.

Унинг сўзларига кўра, Исроил ва унинг минтақадаги иттифоқчиларининг мудофаа тизимлари ракета ва учувчисиз самолётларнинг катта қисмини тутиб олди. Уларнинг ўнлаблари, дейди у, Исроил ҳудудидан ташқарида уриб туширилган.

Ҳагарийнинг айтишича, Эроннинг бир нечта ракеталари Исроилнинг бир ҳарбий объектига озгина зарар етказган. У гап қайси объект ҳақида кетаётганига аниқлик киритмади.

Исроил матбуоти хабарларига кўра, Исроил жанубидаги Негев чўлидаги ҳарбий базага зарар етган бўлиши мумкин. Операция ҳали тугамаган, деди Ҳагарий: "Мудофаамиз нишонларни тутиб олишда давом этмоқда".

 Исроил Бош вазири Бенямин Нетаняху халққа қилган мурожаатида ҳарбийлар "ҳар қандай сценарийга тайёр" эканини айтди. Тез орада Қуддус, Тел-Авив, Ашкелон ва Исроилнинг бошқа шаҳарларида ҳаво ҳужуми сиреналари янгради ва ҳаво ҳужумидан мудофаа тизимларининг шовқини эшитилди.

Америка матбуоти хабарларига кўра, АҚШ ҳаво мудофаа тизимлари Эрон ракеталари ва дронларини тутиб олишда иштирок этган.

Эслатиб ўтамиз,  Эроннинг ушбу ҳужуми 1 апрел куни Исроилнинг Дамашқдаги Теҳрон консуллигига берган зарбаси билан боғлиқ. Унда икки генерал ва қатор офицерлар ҳалок бўлганди. 

Олдинроқ Ўзбекистоннинг Тел-Авивдаги элчихонаси Исроилдаги фуқароларни огоҳлантирганди.