Андижонда ичимлик ва оқова сув нархлари каррасига қимматлайди
Аввалроқ тўрт вилоятда ҳам нархлар кескин ошганди.
Халқ депутатлари Андижон вилояти кенгашининг "Вилоятда ичимлик ва оқава сув хизматлари учун таклиф этилаётган нархларни тасдиқлаш тўғрисидаги" қарори эълон қилинди. Унга кўра, нархлар икки баробарга ошади.
Жумладан, ичимлик суви нархлари ( 1 метр куб) аҳоли учун ҳозир 750 сўмдан 1500 сўмгача кўтарилади. Оқава сув учун нархлар ҳам худди шу миқдорларни ташкил этади.
Бюджет ташкилотлари учун нархлар 1200 сўмдан 2400 сўмгача кўтарилади.
Улгуржи ташкилотлар учун сув нархи 1800 сўмдан 3800 сўмгача ошади.
Тасдиқланган тарифлар ОАВда эълон қилингандан кейин ўн беш кун ўтиб кучга кириши белгиланган.
Эслатиб ўтамиз, аввал Сурхондарё, Қашқадарё, Бухоро, Тошкент вилоятларида ҳам сув нархи ошгани хабар қилинганди.
