Ўзбекистонда доллар курси кескин кўтарилди
Марказий банк валюта бозоридаги вазият юзасидан маълумот берди.
Ўзбекистонда АҚШ доллари курси кескин ошиб, айрим банкларда 12 минг сўмгача етди. Марказий банк эса валюта бозорида вазият юзасидан маълумот эълон қилди.
"Асосий савдо-ҳамкор давлатлар миллий валюталарининг сезиларли қадрсизланиши ташқи савдо ва пул ўтказмалари канали орқали сўмнинг реал самарали алмашув курсининг мустаҳкамланишига олиб келди.
Бу, ўз навбатида, экспорт ва пул ўтказмалари тушумлари каналлари орқали мамлакатимизга валюта тушумларига ва ички валюта бозоридаги таклиф ҳажмига салбий таъсир кўрсатди.
Натижада, ички валюта бозорида сўм алмашув курси девальвацияси суръатининг бироз тезлашиши – фундаментал омиллар таъсирида тўғриланиши кузатилди.
Марказий банк келгусида алмашув курсининг кескин қадрсизланишини олдини олиш бўйича етарли инструментларга эга бўлиб, зарур ҳолларда қўшимча интервенциялар амалга ошириш орқали тебранишлар юмшатиб борилади.
Мазкур тўғриланиш реал самарали алмашув курснинг узоқ муддатли трендига қайтишига олиб келади ва мувозанатли курс валюта тушумларини ошириш орқали бозорда таклиф ўсишига хизмат қилади. Реал самарали алмашув курси йил охиригача ва ўрта муддатли истиқболда нисбатан барқарор бўлади" дейилади унда.
Эслатиб ўтамиз, Ўзбекистоннинг асосий савдо ҳамкорларидан бўлган Россияда ҳам рубл кескин қадрсизланмоқда.
