Венгрия Украинага 50 миллиард евро берилишига қарши чиқди

Венгрия Европа Иттифоқи саммитида Украинага 50 миллиард евро миқдорида иқтисодий ёрдам ажратиш ҳақидаги қарорни тасдиқламади. Натижада қарор ўтмади. 

"Тунги смена натижалари: Украина учун қўшимча пулга вето қўйилди", дея ёзди Венгрия Бош вазири Виктор Орбан X тармоғида.

Европа кенгаши президенти Шарл Мишел Европа Иттифоқи етакчилари Украинага ёрдам кўрсатишни иттифоқ бюджет режасига киритиш бўйича келиша олмаганини тасдиқлади.

Мишелнинг сўзларига кўра, бир давлат бунга қарши чиққан. У давлат номини айтмади, лекин бу Венгрия эканлигини ҳамма билади.

Мишелнинг сўзларига кўра, ЕИ етакчилари келаси йил бошида бу масалага қайтади.

“Мен тафсилотларга тўхталишни истамайман, чунки мен ҳамкасбларим билан келаси йилнинг бошида бўлиб ўтадиган саммитга тайёргарлик кўрмоқчиман”, — дейди у. 

Эслатиб ўтамиз, аввалроқ АҚШ Сенати ҳам Украинага 61 миллиард доллар миқдорида ёрдам ажратиш масаласида келиша олмаганди.