Президент янги лотин алифбосини жиддий ўрганишни айтди

Лотин ёзувидаги янги ўзбек алифбоси бўйича халқ, жамоатчилик томонидан билдирилган барча таклиф ва тавсиялар жиддий ўрганилиб, муҳокамадан ўтганидан сўнг тегишли қонун лойиҳаси яна бир бор кўриб чиқилиб, парламентга киритилади.

Бу ҳақда Шавкат Мирзиёевнинг 21 октябр – Ўзбек тили байрами куни муносабати билан йўллаган табригида айтилган.

"Аввало, Вазирлар Маҳкамасининг Давлат тилини ривожлантириш департаменти фаолияти замон талаблари асосида ташкил этилиб, барча соҳаларда давлат тилида иш юритиш сифатини яхшилаш, хусусан, ахборот-коммуникация йўналишида уни фаол қўллаш борасида ижобий натижаларга эришилаётганини таъкидлаш лозим", дейилади табрикда.

Маълумотга кўра, кейинги йилларда “Ўзбек тилининг изоҳли луғати”, “Алишер Навоий қомуси”, “Заҳириддин Муҳаммад Бобур энциклопедияси”, “Фалсафа” қомусий луғати, “Ўзбекистон юридик энциклопедияси”, “Ислом энциклопедияси”, “Маънавият: асосий тушунчалар луғати”, “Педагогика: энциклопедия”, “Тарих атамалари луғати”, “Адабиётшунослик луғати”, “Юридик атамалар луғати” каби 40 дан зиёд фундаментал китоблар нашр этилган.

Эслатиб ўтамиз, тилшунослар янги алифбодаги 2 та ҳарф бирикмаси ва 2 та ҳарфни янгича усулда қабул қилишни таклиф этишганди:

• O‘ o‘ ҳарфини Õ õ
• G‘ g‘ ҳарфини Ğ ğ
• Sh sh ҳарфини Ş ş
• Ch ch ҳарфини C c ҳарфига ўзгартириш.