Украинада йирик миллиардер ва олигарх қамоққа олинди
Президент Владимир Зеленский ушбу иш юзасидан муносабат билдирган.
Украина йирик бизнесмен, олигарх Игор Коломойский қамоққа олинди. Киев суди уни икки ойга ҳибс қилишга ҳукм чиқарган, шунингдек, Коломойский 509 миллион гривен гаров пули чиқиб озодликда қолиши ҳам мумкин.
У 2 сентябр куни Украина хавфсизлик хизмати томонидан ушланган.
Аммо олигарх 509 миллион гривен (13,7 миллион доллар) пул тўламасликка, балки Киевдаги Шевченко судининг қарори устидан шикоят қилишга қарор қилди. Бу ҳақда унинг адвокатлари журналистларга маълум қилишди.
Хавфсизлик хизмати Коломойскийга Украина Жиноят кодексининг икки моддаси - фирибгарлик ва жиноий йўл билан олинган мулкни легаллаштириш (ювиш) бўйича айблов эълон қилди.
Коломойский суд қарори устидан беш кун ичида шикоят қилиши мумкин.
Тергов маълумотларига кўра, у 2013-2020 йилларда у ярим миллиард гривендан кўпроқ пулни "ювган" ва чет элга олиб чиққан.
Коломойский бу айбловларни рад этмоқда.
Украина президенти Владимир Зеленский шанба куни тунда видеомурожаатида Коломойский ишига яширинча ишора қилиб, урушда ғалаба қозонган янги Украина “мамлакатни талон-тарож қилган ва ўзини қонун ва ҳар қандай қоидалардан устун қўйганларсиз барпо этилиши"ни айтди.
