Ўзбекистонда энг узун шоколад тайёрлаш бўйича рекорд ўрнатилиши кутиляпти
Мутахассислар фикрича, шоколад – меҳрни изҳор қилиш ва ёмон кайфиятдан халос бўлишнинг энг яхши усули.
Шу йилнинг 1 сентябрь санасида пойтахтимиз Тошкентда Ўзбекистон мустақиллигининг 32 йиллиги муносабати билан узунлиги 4 метр бўлган шоколад тайёрланади. Энг узун шоколад ташаббускори эса “Iman chocolate and fruits” жамоасининг профессионал қандолатчиларидир.
“Биламизки, Ўзбекистон ўзининг табиий ва фойдали қуритилган мевалари билан машҳур. Уларда барча озуқавий витаминлар ва минераллар мавжуд. Табиий, ҳеч қандай кимёвий аралашмаларсиз қуритилган мевалар ҳақиқий крафт шоколади билан бирлаштирилса, шубҳасиз ҳақиқий завқ бағишлайди. Биз шоколадларини ишлаб чиқаришда фақат табиий ингредиентлардан фойдаланамиз. Фаолиятимиз "Bean to bar" технологияси асосида дондан то шоколад плиткасигача бўлган жараённи қамраб олган. Шоколад ишлаб чиқаришда Кот-д'Ивуар мамлакатидан келтирилган какао дони ва какао қириндисидан фойдаланилади, – дейди энг узун шоколад ташаббускорлари.
Мутахассислар фикрича, шоколад – меҳрни изҳор қилиш ва ёмон кайфиятдан халос бўлишнинг энг яхши усули. Юқори сифатли крафт шоколадида хурмо, ёнғоқ ва қуритилган меваларнинг ажойиб уйғунлиги эса ҳеч кимни бефарқ қолдирмайди ва албатта ажойиб муҳит бағишлайди.
1 сентябрь куни соат 19:00да “Наврўз” боғида Мустақиллигимизнинг 32 йиллигига тўйга тўёна сифатида бўлиб ўтадиган тадбирда “Iman chocolate and fruits” жамоаси томонидан тайёрланган ноёб таъмга эга шоколадларни таътиб кўриш ва рекорд даражадаги шоколад тайёрлаш жараёнларини кузатиш имконияти яратилмоқда. Тадбирга кириш эса бепул.
Маълумот учун: “Iman chocolate and fruits” жамоаси Ўзбекистон ва хориж қандолатчилик бозорида 3 йилдан буён ўзининг ноодатий ва бир-биридан маззали ширинликлари билан ном қозонган. Шунингдек, Ўзбекистонда ҳам лаззатли шоколад ишлаб чиқариш мумкинлигини, уни экспорт қилиш, хорижга жўнатиш, яқинларимиз ва дўстларимизга ғурур билан “Ўзбекистонда ишлаб чиқарилган” дея фахрланиш мумкинлигини исботлашдир.
