Ўзбекистон Покистондаги аянчли терактга муносабат билдирди

Ўзбекистон ташқи ишлар вазири Бахтиёр Саидов Покистонда 44 киши ҳалок бўлган терактга муносабат билдирди. 

"Покистоннинг Бажаур ҳудудидаги сиёсий қурултойда содир бўлган террорчилик ҳужуми оқибатида кўплаб инсонлар ҳалок бўлганидан чуқур қайғудамиз.

Қурбонларнинг оила аъзолари ва яқинларига ўз ҳамдардлигимизни билдирамиз. Бу оғир дамларда биродар Покистон билан биргамиз" дейилади муносабатда.

Эслатиб ўтамиз, 30 июл куни, Покистон шимоли-ғарбидаги Хайбер-Пахтунхва вилоятида  “Ислом уламолари ассамблеяси” партияси қурултойида теракт содир этилди. Унда 44 киши ўлди, 100 дан ошиқ киши эса жабрланди.