Фарғонада ишчини тупроқ босиб қолди
ФВВ маълум қилишича, бу ҳолат хандақ қазишда хавфсизлик қоидаларининг қўпол равишда бузиш натижасида содир бўлган.
16 май куни соат 11:50 да Фарғона вилояти ФВБ навбатчилик қисмига Ёзёвон тумани «Юқори Сойбўйи» маҳалласида бир кишининг устига тупроқ кўчиб тушгани ҳақида хабар келиб тушган.
Аниқланишича, бу ҳолат хандақ қазишда хавфсизлик қоидаларининг қўпол равишда бузиш натижасида содир бўлган. Воқеа жойига зудлик билан Фарғона вилояти ФВБ қутқарув отрядлари етиб келган.
Кўчиб тушган тупроқ бир неча дақиқаларда олиб ташланди. Қайд этиш жоизки, қутқарувчиларга воқеага гувоҳ бўлган шахслар ҳам ёрдам кўрсатишган.
Маълум бўлишича, жабрланувчи субпудратчи ташкилот ходими бўлиб, хандақ қазиш вақтида хавфсизлик қоидаларини қўпол равишда бузган. У тан жароҳатлари олган бўлсада, шифокорларнинг фикрига кўра, унинг ҳаётига ҳеч нарса таҳдид солмаяпти.
