“2020 йилда 156 та, 2021 йилда 243 та номусга тегиш жинояти содир этилган” – Сенат раиси

Ялпи мажлис кун тартибига 13 масала киритилган бўлиб, шундан 8 таси қонунлардир. “Хотин-қизлар ва болалар ҳуқуқлари, эркинликлари ҳамда қонуний манфаатларини ишончли ҳимоя қилиш тизими янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳаси шулар жумласидан.

“2021-2022 йилларда ҳуқуқни муҳофаза қилувчи органларга аёллар ва қизларга нисбатан тазйиқ ва зўравонлик ҳолатлари юзасидан 72 000 дан зиёд мурожаат келиб тушган. Уларнинг 61 мингдан кўпи ёки қарийб 85 фоизи оилада содир бўлган. Бироқ афсуски, шу кунгача Ўзбекистонда оиладаги зўравонлик бўйича жавобгарликка тортувчи алоҳида норма бўлмаган. Хотин-қизлар ва болаларга нисбатан ён-атрофимизда бўлаётган мудҳиш ва жирканч ҳолатларни олайлик. 2020 йилда 156 та, 2021 йилда 243 та номусга тегиш жинояти содир этилган. Янгиҳаёт туманида 12 ёшли қизнинг зўрланиши ва ўлдирилиши, Хоразмдаги болалар уйи воқеаси (куни кеча бўлган), Сергели туманида она 3 нафар фарзанди билан бирга юқори қаватдан ташлаб ўз жонига қасд қилган... Яна давом эттириш мумкин.

Лекин хулоса қилиш мумкинки, жамиятимизда аёллар ва болалар ҳуқуқларини шиончли ҳимоя қилишга қодир бўлган ҳамда вояга етмаган болаларга нисбатан зўравонлдик ҳолатларига қарши турадиган янада мустаҳкам ва қатъий қонунларга эҳтиёж бор“ – деди Сенат раиси Танзилла Нарбаева қонун лойиҳаси муҳокамасида.