Юнусободдаги мактабда ўқувчи калтакланди: ўқитувчи ишдан кетиши мумкин

Тошкентнинг Юнусобод туманидаги мактабда ўқувчи калтакланди. Натижада ўқитувчи ишдан олинадиган бўлди. Бу ҳақда “Миллар” дастурида ҳикоя қилинади.

Воқеа 15 сентябрь куни соат 8:40 лар атрофида содир бўлган. Ўша куни ўқитувчи икки нафар ўқувчига қўл кўтарган. Улардан бирини синфда судраб, бир неча бор уриб, тан жароҳати етказган.

“Ўғлим телефон қилди. Ойижон, ёрдам беринг, ўртоғимни уриб ўлдириб қўйишяпти, деди. Келсам, ҳамма медпунктда экан. Боламнинг бўйни қизариб кетган, додлаган, йиғлаган. Ёрдам беринг, 102 қилинглар деяпти, синфдоши. Биқинини ушлаб ўтирибди-да, йиғлаб”, деган ўқувчилардан бирининг онаси.

Хабарда айтилишича, ўқувчи калтакланишига у ўқитувчини сўкиши сабаб бўлган. Ўқитувчи болани ураётгани синфда ўрнатилган кузатув камерасида ҳам ёзиб олинган. Бироқ бу видео оммага тақдим этиш учун берилмаган. Воқеа содир бўлган куни синфда яна бир ўқитувчи ҳам бўлган. Бироқ у бошқа бир ўқитувчи бошқа бир синф ўқувчисини ураётганини, кўрган бўлса-да, индамай синфни тарк этгани айтилди.

Вазиятга Юнусобод тумани мактабгача ва таълими бўлими бошлиғи ўринбосари Гуландом Жуманиёзова муносабат билдирди. Унинг айтишича, ўрганиш натижасига кўра тушунтириш хатлари олинди, ўқитувчига ҳайфсан берилди. Ҳолат бўйича ички ишлар ходимлари ҳам шуғулланиб, ўқитувчи билан тузилган шартномани бекор қилиш юзасидан ишлар олиб борилмоқда.

Эслатиб ўтамиз, эндиликда болага зўравонлик қилган ўқитувчилар 2,2 млн сўмгача жаримага тортилиши мумкин.

Президент томонидан имзоланган қонун билан Маъмурий жавобгарлик тўғрисидаги кодексга қўшимча киритилди. Эндиликда ўқитувчи ёки тарбиячи болани урса, куч ишлатса, ҳақорат қилса ёки камситса 440 минг сўмдан 2,2 миллион сўмгача жарима тўлайди. Бундан ташқари, жавобгарликка тортилган педагог 1 йил давомида ўқитувчи бўлиб ишлай олмайди.