Қирғизистонда болалар учун ижтимоий тармоқларни тақиқлаш кўриб чиқилмоқда
Мамлакатда ҳозир ўқувчиларга дарс жараёнлари пайтида мобил қурилмалардан эркин фойдаланиш тақиқланган. Аввалроқ вояга етмаганларга ижтимоий тармоқларни тақиқлаш Европа иттифоқи миқёсида ҳам кўриб чиқилганди.
Қирғизистон Таълим вазирлиги болаларнинг ижтимоий тармоқларга киришини чеклашни кўриб чиқмоқда. Бу ҳақда Таълим вазири Догдуркул Кендирбаева "Aкирпресс" нашрига берган изоҳида маълум қилди.
Унинг сўзларига кўра, вазирлик болаларнинг рақамли платформалардан фойдаланишини назорат қилишни кучайтириш зарур деб ҳисоблайди. Вазирнинг таъкидлашича, болалар катталар назоратисиз ижтимоий тармоқларда кўп вақт сарфлашлари ва ота-оналар ва ўқитувчилар томонидан ҳар доим ҳам назорат қилинмайдиган маълумотларга киришлари мумкин.
“Биз бу қадамни қўйишимиз керак, чунки болалар ижтимоий тармоқларда назоратсиз бўлишади ва биз улар қандай маълумотларга киришаётганини билмаймиз”, деди Кендирбаева.
Вазир шунингдек, мактабларда телефондан фойдаланишга қўйилган амалдаги чекловларни эслатди. Қарорга кўра, ўқувчиларга дарс-жараёнлари пайтида мобил қурилмалардан эркин фойдаланиш тақиқланган. Истисно телефон ўқув жараёни учун зарур бўлган ва ўқитувчи назорати остида ишлатиладиган ҳолатлар учун ҳам мавжуд.
Кендирбаеванинг таъкидлашича, кичик ёшдаги ўқувчилар мактабда тахминан уч соат вақт ўтказадилар, қолган вақтларида эса таълим муассасасидан ташқарида, жумладан, ота-оналари билан бирга бўладилар. Шунинг учун, унинг фикрича, болаларнинг рақамли хавфсизлиги масаласи нафақат мактабларнинг, балки оилаларнинг ҳам иштирокини талаб қилади. Бироқ, болалар учун ижтимоий тармоқларга чекловлар киритиш бўйича якуний қарор ҳали қабул қилинмаган.
Аввалроқ Европа Иттифоқида 13 ёшга тўлмаганларга ижтимоий тармоқлардан фойдаланиш тақиқланиши муҳокама этилганди. 15 ёшгача бўлганларга эса шахсий аккаунт очишга рухсат берилмайди. Чекловлар ижтимоий тармоқлар, онлайн ўйинлар, AI чатботлари ва видео алмашиш платформаларига нисбатан қўлланилади.
