Нигерияда спиртли ичимлик ичиш оқибатида салкам 50 киши вафот этди
Гап "Маймун думи" номи билан танилган машҳур алкоголли ичимлик ҳақида кетмоқда. Унинг таркибида метанол моддаси борлиги гумон қилинган.
Нигерияда таркибида метанол борлиги гумон қилинган спиртли ичимликларни истеъмол қилиш натижасида қарийб эллик киши вафот этди.
Мамлакатда маҳаллий спиртли ичимликларни истеъмол қилиш айниқса, қишлоқ жойларда кенг тарқалган, чунки у ерда қалбаки спиртли ичимликларни топиш осон ва унинг тарқатилиши тартибга солинмаган.
Расмийлар хабар беришича, Нигериянинг жанубида маҳаллий спиртли ичимликни ичганидан кейин камида 48 киши вафот этди ва яна 100 га яқин одам даволанмоқда.
Ондо штати соғлиқни сақлаш вазири Банжи Ажака Одигбо ва Иреле маҳаллий бошқарув ҳудудларида заҳарланиш ҳолатлари қайд этилганини айтди. Унинг сўзларига кўра, жами 182 киши жабрланди, уларнинг баъзилари касалхонада даволанмоқда.
"Мен жума куни спиртли ичимлик ичдим ва уйдан чиқдим. Шанба куни ҳеч нарса кўра олмаётганимни пайқадим", деди жабрланувчилардан бири, 32 ёшли Сола Адебайо маҳаллий TVC News телеканалига.
Associated Press агентлигининг тушунтиришича, маҳаллий ишлаб чиқарилган спиртли ичимликларни истеъмол қилиш Африканинг энг аҳолиси зич жойлашган мамлакати Нигерияда, айниқса, арзонроқ ва камроқ тартибга солинган қишлоқ жойларда кенг тарқалган.
"Ҳаммаси жуда тез содир бўлади. Шунча миқдорда спиртли ичимлик истеъмол қилганингиздан сўнг, буйракларингиз ишдан чиқади, кўриш қобилиятингиз ёмонлашади ва миянгиз шикастланади", деди вазир Ажака Associated Press агентлигига ичимлик ҳақида гапириб.
Ондо штати полицияси вакили Абайоми Джимоҳнинг айтишича, ҳодиса юзасидан 15 киши ҳибсга олинган, жумладан, "метанол сақлаганликда гумон қилинган моддаларни ишлаб чиқаришда иштирок этган ва ҳозирда полицияга терговда ёрдам бераётган" бир киши ҳам бор.
Маҳаллий аҳоли Associated Press агентлигига "Маймун думи" номи билан танилган машҳур юқори алкоголли ўсимлик ичимлиги метанол билан аралаштирилган ва бу ўлимга олиб келган деб ҳисоблашларини айтишди.
