Трамп ўғлининг тўйи Путинга яқин олигарх томонидан молиялаштирилгани маълум бўлди
АҚШ президентининг келини Беттина Трамп ижтимоий тармоқларда жуфтлик номидан эълон қилган баёнотда Кремлевни уларнинг "яқин дўсти" деб атади. Тўйдан кейинги икки кунлик тантаналарни у ташкил қилгани таъкидланди.
Кичик Доналд Трампнинг май ойида бўлиб ўтган тўй тантаналарининг бир қисми Россия президенти Владимир Путинга яқинлиги билан танилган россиялик олигарх Умар Кремлев томонидан молиялаштирилган.
Бу ҳақда АҚШ президенти Дональд Трампнинг ўғли кичик Доналд Трамп ва унинг рафиқаси Беттина Трамп эълон қилишди.
АҚШ президентининг келини ижтимоий тармоқларда жуфтлик номидан эълон қилган баёнотда Кремлевни уларнинг "яқин дўсти" деб атади. Тўйдан кейинги икки кунлик тантаналарни у ташкил қилгани таъкидланди.
Баёнотда Кремлевнинг қўллаб-қувватлаши "ниҳоятда саховатли тўй совғаси" деб аталди.
"Биз ўшанда бунинг учун миннатдор эдик ва бугун ҳам миннатдормиз", дейилади баёнотда.
Жуфтлик шунингдек, дўстлик сиёсий мотивацияни талаб қилмаслигини таъкидлади.
"Сахийлик автоматик равишда ҳеч қандай яширин мақсадни англатмайди. Баъзан тўй совғаси шунчаки тўй совғаси бўлади", деб қўшимча қилишди улар.
Шу билан бирга, ProPublica нотижорат тергов журналистика ташкилоти ўша куни эълон қилинган ҳисоботда Кремлев юз минглаб долларга тушган уч кунлик тантаналарни тўлаганини даъво қилди.
Кремлевнинг Путинга яқинлиги
Халқаро бокс ассоциацияси (IBA) президенти Умар Кремлев яқинда Путин томонидан "Дўстлик" ордени билан тақдирланганди.
Кичик Доналд Трамп илгари Россия билан алоқалари туфайли жамоатчилик эътиборида бўлган.
2016 йилги президентлик кампанияси давомида Трамп кичикнинг Нью-Йорк шаҳридаги Трамп минорасида россиялик адвокат Наталья Весельницкая билан учрашуви Трамп кампанияси Россиянинг сайловларга аралашишга уринишлари билан мувофиқлаштирилганми ёки йўқми деган федерал ва конгресс терговларида муҳим воқеа бўлди.
