Ўзбекистонда туғилган аёл Японияда партия раҳбари бўлди
Орзугул Бобохўжаева 2023 йилда у Сетагая округидан парламент аъзоси этиб сайланганди. У кўп маданиятли жамиятни тарғиб қилувчи янги сиёсий гуруҳнинг раҳбарига айланди.
Ўзбекистонда туғилган Орзугул Бобохўжаева Японияда партия раҳбари бўлди.
2023 йилда у Сетагая округидан парламент аъзоси этиб сайланганди.
Орзугул Бобохўжаева кўп маданиятли жамиятни тарғиб қилувчи янги сиёсий гуруҳнинг раҳбари бўлди.
Yonhap ахборот агентлиги хабар беришича, Ўзбекистонда туғилган Орзугул Бобохўжаева ва Жанубий Кореяда туғилган Жеонг Жае-Вук (японча исми: Даи Акира) "Шинсеито" (Янги авлод партияси) партиясини туздилар.
Бобохўжаева сиёсий гуруҳ раиси, Жеонг эса ҳамраис бўлди.
Жеонг Жае-Вук 1985 йилда Японияга халқаро талаба сифатида келган ва кейинчалик Япония фуқаролигини олган. У Шин-Окубо Корея округидаги бизнес эгалари гуруҳи бўлган Шинжуку Корея тадбиркорлари ассоциациясини бошқарган.
Бобохўжаева ҳам Япония фуқаролигини олган. 2023 йилда у Сетагая округи аъзоси этиб сайланди. Маълумки, ўзбекистонлик бу аёл Япония Конституциявий Демократик партиясига номзод сифатида сайланган ва финал босқичида 6700 дан ортиқ овоз тўплаган.
Япония Ўзбекистонни Марказий Осиёдаги стратегик шериклари қаторига киритди.
Сиёсатчиларнинг фикрига кўра, бу Япония фуқаролигини олган фуқаролар сиёсий партия тузган биринчи ҳолат.
Партия ўз фаолиятини кўп сонли хорижий аҳоли истиқомат қиладиган Шинжуку туманига қаратишни режалаштирмоқда.
Чеонг Жае-воокнинг таъкидлашича, ҳақиқий кўп маданиятли бирга яшаш одамлар, миллати ёки келиб чиқишидан қатъи назар, Япония қонунларига риоя қиладиган, бир-бирларини ҳурмат қиладиган ва хавфсиз яшашлари мумкин бўлган жамиятни яратишни англатади.
Янги партия нимани таклиф қилмоқда?
Партиянинг асосий устувор йўналишларидан бири кўп маданиятли жамиятни ривожлантириш бўлади. Бобохўжаева партия бирон бир миллат ёки келиб чиқиши вакиллари учун яратилмаганлигини ва Япониядаги чет элликлар сонини кўпайтиришни мақсад қилмаганини таъкидлади.
Шинсеито шунингдек, тадбиркорларни қўллаб-қувватлаш, маданиятни сақлаб қолиш ва халқаро миқёсда малакали кадрлар тайёрлашни ният қилган.
"Биз болаларнинг ёшлигидан Япония тарихи ва маданиятини, шунингдек, улар яшайдиган жой тарихини ўрганишларини ва ўз мамлакатлари ва минтақалари ҳақида ўз сўзлари билан гапира олишларини истаймиз. Шу билан бирга, ёшлар бутун дунёдан келган одамлар билан тенг равишда мулоқот қилишлари, ўқишлари ва ишлашлари учун хорижий тилларни билиш ва халқаро тафаккурни ривожлантириш зарур", деб таъкидлади сиёсатчи.
У келажакда болалар япон технологиялари, товарлари, маданияти ва хизматларини бутун дунё бўйлаб тарғиб қила олишларига умид билдирди.
Авлодлар ўртасида бундай алоқани яратиш ҳам партия тарғиб қиладиган кўп маданиятли ҳамкорлик концепциясининг бир қисмидир.
