"Қамчиқ" довони ҳудудида адашиб қолган 17 киши қутқарилди
Ҳодиса оқибатида тан жароҳати олганлар йўқлиги маълум қилинган.
ФВВ қутқарувчилари "Қамчиқ" довони ҳудудида адашиб қолган 17 нафар фуқароларга амалий ёрдам кўрсатишди.
12 сентябр куни "112" тизими орқали "Қамчиқ" Махсус қутқарув бошқармасига Тошкент вилояти Оҳангарон тумани "Тошкент-Ўш" автомобил йўлининг "Водий-Тошкент" йўналиши 107-километрдаги "Чинор" ҚФЙ ҳудудида фуқаролар адашиб қолгани бўйича маълумот келиб тушди.
Маълум бўлишича, 17 нафар фуқаролар дам олиш мақсадида чиқиб тоғли ҳудудда адашиб қолган.
Хабарга асосан, зудлик билан воқеа жойига қидирув-қутқарув бўлинмалари жалб қилинди. Қидирув-қутқарув ишлари давомида қутқарувчилар тоғ қияликларидан жами 17 нафар фуқарони топиб, уларни хавфсиз ҳудудга олиб тушишди ҳамда яшаш манзилларига соғ-саломат етказиб қўйишди, дейилади хабарда.
Ҳодиса оқибатида тан жароҳати олганлар йўқ.
