UzAuto Motors илк бор гибрид автомобил сотуви бошланганини эълон қилди
Янги Chevrolet Equinox PHEV ташқи электр тармоғидан қувватланувчи (Plug-in Hybrid Electric Vehicle) тизимга эга. Тизим кундалик сафарларнинг аксариятини фақат электр қувватида амалга ошириш имконини беради.
UzAuto Motors Ўзбекистонда илк бор гибрид автомобили Chevrolet Equinox PHEV кроссовери сотуви бошланишини эълон қилади.
Моделнинг сотувга чиқарилиши маҳаллий бозорда Chevrolet брендининг биринчи гибрид (PHEV) автомобили тақдим этилганини англатади.
Автомобил харидорларга Activ 80KM ва Activ 120KM комплектацияларида тақдим этилади.
Янги Chevrolet Equinox PHEV оддий гибрид автомобил эмас. У ташқи электр тармоғидан қувватланувчи (Plug-in Hybrid Electric Vehicle) тизимга эга. Тизим кундалик сафарларнинг аксариятини фақат электр қувватида амалга ошириш имконини беради. Бензинли двигател эса узоқ масофаларга сафар қилишда қўшимча қулайлик яратади.
Chevrolet Equinox PHEV комплектациясига қараб 17 ва 24 кВт·соат сиғимли LFP аккумуляторга эга. Activ 80KM комплектацияси фақат электр қувватида 80 км гача, Activ 120KM комплектацияси эса 120 км гача масофани босиб ўтиш имконини беради. Толиқ қувватланган батарея ва тўлдирилган ёқилғи баки билан автомобильнинг умумий юриш захираси 1 000 км дан ошади.
Қувват қурилмаси замонавий 1,5 литрли турбо бензин двигатели, 188 от кучига эга электромотор ва 2 поғонали DHT гибрид трансмиссияси уйғунлигида ишлайди. У ёқилғи тежамкорлигини оширади, тезкор тезланиш, равон ҳаракат ва янада қулай бошқарув билан таъминлайди.
Мавжуд хавфсизлик ва ҳайдовчига ёрдам бериш тизимлари қаторига адаптив круиз-контроль, автоматик фавқулодда тормозлаш тизими, ҳаракат бўлагида ушлаб туриш тизими, “кўринмас” зоналарни мониторинг қилиш, 360 даражали атрофни кўриш камераси, 6 та хавфсизлик ёстиқчалари ҳамда йўл белгиларини аниқлаш тизими киради. Автомобил, шунингдек, ҳайдовчининг диққатини оширадиган ва йўловчилар хавфсизлигини таъминлайдиган қўшимча технологиялар билан жиҳозланган.
Интерьерда эса 11 дюймли рақамли қурилмалар панели, 11 дюймли сенсорли мультимедиа тизими, Apple CarPlay, симсиз қувватлаш, панорамали люк, олд ўриндиқларни иситиш ва вентиляция қилиш каби қулайликлар тақдим этилган.
Кучли “plug-in hybrid” технологияси билан жиҳозланган ушбу модель электр автомобилларининг афзалликларини ички ёнув двигателининг эркинлиги билан уйғунлаштириб, мижозларга бир автомобильнинг ўзида тежамкорлик, узоқ масофа ва юқори унумдорликни таклиф этади.
Chevrolet Equinox PHEV автомобилининг тавсия этилган чакана нархи:
Chevrolet Equinox PHEV Activ 80KM – 463 500 000 сўм
Chevrolet Equinox PHEV Activ 120KM – 478 500 000 сўм.
