Саида Мирзиёева Қатардаги кўргазма очилишида иштирок этди
Ушбу экспозицияда юртимиз музейлари ҳамда Қатар коллекцияларидан ўрин олган ноёб экспонатлар жамланган.
Президент Администрацияси раҳбари Саида Мирзиёева Шайха Ал-Маясса бинт Ҳамад бин Халифа Ол Соний билан биргаликда Қатар Ислом санъати музейида ташкил этилган “Ўзбекистон: ҳаракатдаги мерос” кўргазмасининг очилишида иштирок этди.
Ушбу экспозицияда юртимиз музейлари ҳамда Қатар коллекцияларидан ўрин олган ноёб экспонатлар жамланган.
Хусусан, Ислом дини тарқалишидан аввалги асрлар ва Сомонийлар, Темурийлар даврларидан то бугунги кунгача бўлган тарихий босқичларни қамраб олган нодир осори-атиқалар, анъанавий ҳунармандчилик ва тўқимачилик санъати намуналари шулар жумласидан.
Бу — Қатар халқи ва унинг меҳмонларини бой тарихимиз ҳамда меросимиз билан яқиндан таништириш учун қулай имконият, шунингдек, Ўзбекистон-Қатар маданий алоқаларини янада ривожлантириш йўлидаги муҳим қадамдир.
Шу куни қатарлик етти нафар ҳунарманднинг Тошкент, Самарқанд ва Бухоро бўйлаб ижодий сафари якунларига бағишланган “Экташиф Ўзбекистон” кўргазмаси ҳам ўз ишини бошлади.
Унда юртимизнинг бой маданияти, анъаналаридан илҳомланган усталар томонидан яратилган нозик заргарлик буюмлари, хаттотлик санъати намуналари, нафис гиламлар ҳамда сафар таассуротларини акс эттирувчи фотосуратлар жамланмаси намойиш этилмоқда.
